ບໍລິສັດ ທ່າບົກ-ວັງເຕົ່າ ຈໍາກັດ ມີຄວາມພ້ອມຮອບດ້ານໃຫ້ບໍລິການ, ພາຍຫຼັງທີ່ໄດ້ທົດລອງເປີດໃຫ້ບໍລິ ການມາໄດ້ເກືອບປີ ແລະ ມີລະບົບຄົບຊຸດເປັນສູນກາງໂລຈິສຕີກ,ພ້ອມໃຫ້ບໍລິການຄ່ຽນຖ່າຍສິນຄ້າເຂົ້າ-ອອກຜ່ານດ່ານຊາຍແດນວັງເຕົ່າ-ຊ່ອງເມກ ແລະ ຈະໄດ້ເປີດໃຫ້ບໍລິການຢ່າງເປັນທາງການໃນໄວໆນີ້.

ທ່ານ ບຸນທະວີ ແກ່ນປະເສີດ ຮອງຜູ້ອໍານວຍການບໍລິສັດທ່າບົກ-ວັງເຕົ່າ ຈໍາກັດໄດ້ໃຫ້ສໍາພາດວ່າ: ເຂດ ທ່າບົກ-ວັງເຕົ່າແມ່ນ 1 ໃນ 9 ຈຸດຂອງທ່າບົກໃນທົ່ວປະເທດ,ຊຶ່ງໄດ້ຮັບການພັດທະນາພາຍໃຕ້ສົນທິສັນຍາລະຫວ່າງປະເທດວ່າດ້ວຍທ່າບົກຮ່ວມກັບຄະນະກໍາມະທິການເສດຖະກິດ-ສັງຄົມ ປະຈໍາພາກພື້ນອາຊີ-ປາຊີຟີກ ຂອງອົງການສະຫະປະຊາຊາດ ແລະ ລັດຖະບານແຫ່ງ ສປປ ລາວ ໃຫ້ສັດຕະຍະບັນ, ຊຶ່ງແມ່ນທຸລະກິດການບໍລິການສຸດທີ່ສໍາຄັນທີ່ຕັ້ງຢູ່ເຂດພັດທະນາເສດຖະກິດວັງເຕົ່າ-ໂພນທອງ ແຂວງຈໍາປາສັກ,ໂດຍແມ່ນບໍລິສັດດວງດີກໍ່ສ້າງຂົວ-ທາງ ຈໍາກັດ, ເປັນຜູ້ລົງທຶນໃນມູນຄ່າທັງໝົດ 250 ລ້ານໂດລາສະຫະລັດ, ກວມເນື້ອທີ່ທັງໝົດ 253 ເຮັກຕາ ແລະ ໄດ້ວາງສີລາລຶກໂຄງການກໍ່ສ້າງເຂດພັດທະນາເສດຖະກິດດັ່ງກ່າວໃນທ້າຍປີ 2019 ຜ່ານມາ.

ການກໍ່ສ້າງໂຄງການທ່າບົກ-ວັງເຕົ່າແມ່ນ 1 ໃນ 8 ກິດຈະການສໍາຄັນຂອງໂຄງການກໍ່ສ້າງເຂດພັດທະນາເສດຖະກິດວັງເຕົ່າ-ໂພນທອງ, ຊຶ່ງໄດ້ເລີ່ມລົງມືກໍ່ສ້າງໃນຕົ້ນປີ 2020, ກວມເນື້ອທີ່ທັງໝົດ 50 ເຮັກຕາຂອງໂຄງການ, ປະຈຸບັນການກໍ່ສ້າງທ່າບົກ-ວັງເຕົ່າໄລຍະ I ທີ່ກວມເນື້ອທີ່ 25 ເຮັກຕາແມ່ນມີຜົນສໍາເລັດ 100% ແລະ ໄດ້ທົດລອງເປີດບໍລິການໃນຕົ້ນເດືອນກັນຍາ 2021 ເພື່ອກຽມຄວາມພ້ອມໃຫ້ແກ່ການເປີດບໍລິການຢ່າງເປັນທາງການ, ຂອບເຂດການບໍລິການແມ່ນປະກອບມີຄື: ຮັບ ແລະ ສົ່ງສິນຄ້າ, ເຕົ້າໂຮມ ແລະ ແຈກຢາຍສິນຄ້າ, ບໍລິການລະບົບສາງ, ຊິງຊັ່ງນໍ້າໜັກສິນຄ້າ (ຕູ້ສີນຄ້າເພື່ອໃຫ້ຮູ້ຊັດເຈນນໍ້າໜັກ ແລະ ບໍລິມາດຂອງສິນຄ້າ, ບໍລິການຍົກຍໍຄ່ຽນຖ່າຍສິນຄ້າ, ຕູ້ສິນຄ້າ ດ້ວຍເຄື່ອງຍົກຍໍທີ່ທັນສະໄໝ ມີປະສິດທິພາບ, ປະສິດທິຜົນ, ຄວາມວ່ອງໄວ ແລະ ຄວາມປອດໄພສູງ, ບໍລິການແຈ້ງພາສີແບບເອເລັກໂຕນິກ, ແຈ້ງກວດກາພຶດ ແລະ ສັດ, ກວດກາອາຫານ-ຢາ ແລະ ກວດກາພະຍາດຕິດຕໍ່ ພ້ອມທັງກວດກາຄຸນນະພາບນໍ້າມັນເຊື້ອໄຟ, ໂດຍລວມແລ້ວທ່າບົກ-ວັງເຕົ່າແມ່ນສູນກາງໂລຈິສຕີກສ໌ Logistics ທີ່ເປັນຈຸດກວດກາຂົນສົ່ງ ແລະ ຍົກຍໍຄ່ຽນຖ່າຍສິນຄ້າເຂົ້າ-ອອກ, ສິນຄ້າຜ່ານແດນ, ເປັນລະບົບ ຮັບ-ສົ່ງ, ເຕົ້າໂຮມແຈກຢາຍ, ຝາກສາງ ແລະ ຄ່ຽນຖ່າຍ ເຂົ້າ-ອອກ ຕູ້ສິນຄ້າ ແລະ ບໍລິການອື່ນໆ…ເພື່ອຕອບສະໜອງຄວາມຕ້ອງການ ຂອງຜູ້ປະກອບການ ນໍາເຂົ້າ-ສົ່ງອອກສິນຄ້າ ຜ່ານດ່ານຊາຍແດນສາກົນວັງເຕົ່າ.

ສຳລັບການບໍລິການດ້ານການນໍາເຂົ້າ-ສົ່ງອອກສິນຄ້າຜ່ານທ່າບົກ-ວັງເຕົ່າໃນປັດຈຸບັນແມ່ນເປັນການດໍາເນີນການນໍາເຂົ້າສິນຄ້າຈາກຕ່າງປະເທດ ແລະ ສົ່ງສິນຄ້າພາຍໃນໄປຕ່າງປະເທດ, ເຮັດໃຫ້ສະພາບຄວາມດຸ່ນດ່ຽງລະຫວ່າງການນໍາເຂົ້າ ແລະ ສົ່ງອອກດີຂຶ້ນເທື່ອລະກ້າວ, ສິນຄ້າຂາອອກຢູ່ແຂວງຈໍາປາສັກມີທ່າຂະຫຍາຍຕົວສູງຂຶ້ນໃນແຕ່ລະປີນັບແຕ່ເປີດການທົດລອງບໍລິການມາຈົນເຖິງປັດຈຸບັນບໍລິສັດ ທ່າບົກວັງເຕົ່າ ຈຳກັດໄດ້ມອບພັນທະອາກອນເຂົ້າງົບປະມານແຫ່ງລັດ, ຊຶ່ງໄດ້ມອບອາກອນມູນຄ່າເພີ່ມເປັນເງິນຈໍານວນ 3,6 ຕື້ກີບ, ມອບອາກອນເງິນເດືອນເປັນເງິນຈໍານວນ 187 ລ້ານກີບ. ນອກຈາກນີ້, ບໍລິສັດຍັງໄດ້ສ້າງວຽກເຮັດງານທໍາໃຫ້ແກ່ປະຊາຊົນພາຍໃນທ້ອງຖິ່ນໄດ້ຫຼາຍກວ່າ 200 ກວ່າຄົນ, ທັງໄດ້ສ້າງໃຫ້ການຂົນສົ່ງສິນຄ້າລະຫວ່າງປະເທດຜ່ານດ່ານສາກົນວັງເຕົ່າມີຄວາມເປັນລະບົບລະບຽບ, ຄວາມສະດວກ, ປອດໄພ, ວ່ອງໄວ ຮັບປະກັນໃຫ້ສິນຄ້າເຖິງປາຍທາງໄດ້ດີກວ່າເກົ່າ.