ວັນທີ 1 ກັນຍາ 2022 ນີ້, ໂຮງຮຽນກໍ່ສ້າງນາຍສິບ ເລກ 1 ໄດ້ຈັດຕັ້ງປະກາດການເລື່ອນຊັ້ນ, ເລື່ອນທຽບຊັ້ນ ໃຫ້ນາຍທະຫານຂຶ້ນ ໂດຍການເຂົ້າຮ່ວມເປັນປະທານຂອງ ສະຫາຍ ພົນຈັດຕະວາ ສີລາວົງ ບຸນມີໄຊ ຫົວໜ້າການເມືອງໂຮງຮຽນ, ມີຕາງໜ້າຄະນະພັກ- ຄະນະບັນຊາ 5 ຫ້ອງ, 4 ກອງພັນ ຕະຫຼອດຮອດຜູ້ທີ່ໄດ້ຮັບການເລື່ອນຊັ້ນໃໝ່ເຂົ້າຮ່ວມ.
ສະຫາຍ ພັນໂທ ບຸນລ້ຳ ສີ ຈອມທອງ ຫົວໜ້າພະແນກພະ ນັກງານໂຮງຮຽນກໍ່ສ້າງນາຍສິບເລກ1 ໄດ້ຂຶ້ນຜ່ານຂໍ້ຕົກລົງຂອງກະຊວງປ້ອງກັນປະເທດ ແລະ ກົມໃຫຍ່ການເມືອງກອງທັບ ວ່າດ້ວຍການເລື່ອນຊັ້ນ, ເລື່ອນທຽບຊັ້ນໃຫ້ນາຍທະຫານຢູ່ໂຮງຮຽນກໍ່ສ້າງນາຍສິບເລກ1 ອີງຕາມກົດໝາຍນາຍທະຫານກອງທັບປະຊາຊົນລາວ (ສະບັບປັບປຸງ) ໃນພາກທີ ll ໝວດທີ່ 3 ມາດຕາ 22 ແລະ 23 ວ່າດ້ວຍການເລື່ອນຊັ້ນນາຍທະຫານ ຈຳນວນ 17 ສະຫາຍ ໃນນີ້ເລື່ອນຊັ້ນ ຮ້ອຍເອກ ຂຶ້ນຊັ້ນ ພັນຕີ 5 ສະຫາຍ, ເລື່ອນທຽບຊັ້ນ ຮ້ອຍເອກ ຂຶ້ນຊັ້ນ ພັນຕີ 2 ສະຫາຍ, ເລື່ອນຊັ້ນ ຮ້ອຍໂທ ຂຶ້ນຊັ້ນຮ້ອຍເອກ 1 ສະຫາຍ, ເລື່ອນທຽບຊັ້ນ ຮ້ອຍໂທ ຂຶ້ນຊັ້ນ ຮ້ອຍເອກ 4 ສະຫາຍ, ເລື່ອນຊັ້ນ ຮ້ອຍຕີ ຂຶ້ນຊັ້ນ ຮ້ອຍໂທ 2 ສະຫາຍ, ເລື່ອນຊັ້ນ ວາທີ ຂຶ້ນຊັ້ນ ຮ້ອຍຕີ 2 ສະຫາຍ ແລະ ເລື່ອນທຽບຊັ້ນ ວາທີ ຂຶ້ນຊັ້ນ ຮ້ອຍຕີ 1 ສະຫາຍ.
ໂອກາດນີ້, ສະຫາຍ ພົນຈັດ ຕະວາ ສີລາວົງ ບຸນມີໄຊ ກໍໄດ້ສະແດງຄວາມຍ້ອງຍໍຊົມເຊີຍຕໍ່ ສະຫາຍທີ່ໄດ້ຮັບຊັ້ນໃໝ່ພ້ອມກັນຍາດມາໄດ້ໃນຄັ້ງນີ້ ແລະ ຮຽກຮ້ອງໃຫ້ທຸກສະຫາຍຈົ່ງພ້ອມກັນສືບຕໍ່ຍົກສູງຄວາມຮັບ ຜິດຊອບຕໍ່ໜ້າທີ່ການເມືອງຂອງຕົນ, ມີຄຸນທາດການເມືອງໜັກແໜ້ນ, ມີຄວາມບໍລິສຸດ ຊື່ສັດສຸດ ຈະລິດຕໍ່ການຈັດຕັ້ງ, ຄົ້ນຄວ້າເຊື່ອມຊຶມ ກຳແໜ້ນຕໍ່ແນວທາງແຜນນະໂຍບາຍຂອງພັກ-ລັດ ແລະ ຂອງກອງທັບໃຫ້ເຂັ້ມງວດ, ເອົາໃຈໃສ່ເຮັດວຽກງານສຶກ ສາອົບຮົມການເມືອງ-ນຳພາ ແນວຄິດຕິດພັນກັບວຽກງານຂະບວນການຕົວຈິງຂອງກົມກອງ, ຄົ້ນຄວ້າຊອກຮູ້ຮ່ຳຮຽນເອົາວິທີທາງອັນໃໝ່ເພື່ອປັບປຸງແບບ ແຜນວິທີເຮັດວຽກໃຫ້ສອດຄ່ອງ ບົນຫຼັກການລວມ ສູນປະຊາທິປະ ໄຕ ເຮັດວຽກເປັນໝູ່ຄະນະແບ່ງ ວຽກໃຫ້ບຸກຄົນຮັບຜິດຊອບ, ເພີ່ມຄວາມສາມັກຄີໃຫ້ເປັນປຶກແຜ່ນ, ຕັ້ງໜ້າປະກອບສ່ວນເຂົ້າໃນການປັບປຸງກໍ່ສ້າງກຳລັງ, ກົມ ກອງກາຍເປັນໜ່ວຍພັກປອດໃສ ເຂັ້ມແຂງ ໜັກແໜ້ນ, ກົມກອງ 3 ປອດ,ກົມກອງວັດທະນະທຳ-ນັກຮົບວັດທະນະທຳ ແລະ ເຝິກ ຝົນຫຼໍ່ຫຼອມຕົນເອງໃນທຸກດ້ານເພື່ອສ້າງຕົນເອງໃຫ້ກາຍເປັນພະ ນັກງານລຸ້ນສືບທອດປ່ຽນແທນໃນອານາຄົດ.
ໂດຍ: ນ້ອຍຈັນໄພ ແກ້ວວັນເຮືອງ
