ຄົນເຮົາເກີດມາມີຫຼາຍຢ່າງທີ່ເຮົາເບິ່ງບໍ່ເຫັນ ແລະຄາດບໍ່ເຖິງ ເຊິ່ງສາມາດສົ່ງຜົນກະທົບຕໍ່ການດຳລົງຊີວິດໄດ້ ແຕ່ຫຼາຍຄົນບໍ່ຮູ້ ບາງຈຳນວນກໍ່ບໍ່ໃສ່ໃຈ ສະນັ້ນຜູ້ເຖົ້າຜູ້ແກ່ເພິ່ນຈັ່ງເອົາປະສົບການມາສອນມາເຕືອນກັນລຸ້ນຕໍ່ລຸ້ນ ເພື່ອບໍ່ໃຫ້ລູກຫຼານເຮັດພາດພັ້ງໃນສິ່ງທີ່ສາມາດຫຼີກໄດ້ ນັ້ນເອີ້ນວ່າ “ສິ່ງທີ່ຄວນຄະລຳ”

ຂໍ້ຫ້າມກໍ່ຄືແນວທີ່ຄວນຄະລຳສຳລັບຄົນບູຮານ !! ທີ່ບໍ່ໃຫ້ເຮັດໃນເວລາຕ່າງໆ ໃຜປະຕິບັດໄດ້ຖືວ່າຊີວິດດີ ( ຕາມຄວາມເຊື່ອ ) ຜູ້ໃດເຮັດໄດ້ພິດໄພຈະມີໜ້ອຍແລ!

1. ຫ້າມນອນຕອນຫົວຄ່ຳເພາະອາດຖືກຜີອຳ ຫຼື ບໍ່ດັ່ງນັ້ນຜີກໍ່ຈະມາລັກເອົາວິນຍານເຮົາໄປຢູ່ນຳ

2. ຢ່າປູກກົກໄມ້ໃຫຍ່ໄວ້ໃກ້ເຮືອນ ຫຼື ບໍລິເວນດິນເຮືອນ ເພາະຕົ້ນໄມ້ໃຫຍ່ ມັກເປັນແຫລ່ງສິງສະທິດຂອງພວກຜີເລ່ລ້ອນ ຫາກຜີພວກນີ້ໄດ້ສິງຢູ່ຕົ້ນໄມ້ຂອງເຮືອນໃດກໍ່ຈະນຳແຕ່ສິ່ງອັບປະມົງຄຸນມາໃຫ້

3. ຫ້າມໃຊ້ພ້າ, ມີດ ຟັນຂັ້ນໄດ ເພາະຂັ້ນໄດຈະມີຜີບ້ານຜີເຮືອນຄອຍຫັກສາຢູ່ ຖ້າຫາກໃຜນຳຜ້າ ຫຼື ມີດ ໄປຟັນຂັ້ນໄດກໍ່ຈະຖືກຢູ່ຕົກຂັ້ນໄດໄດ້

4. ຫ້າມໃຊ້ເສົາຕົກນ້ຳມັນປຸກເຮືອນ ເພາະເສົາຕົກນ້ຳມັນນັ້ນຈະມີວິນຍານຜີສິງຢູ່ ຫາກນຳມາປູກເຮືອນກໍ່ຈະເຮັດໃຫ້ເກີດເຫດຮ້າຍຂຶ້ນ

5. ຢ່າດ່າຟ້າແດດລົມຝົນ ເພາະຈະເຮັດໃຫ້ຊີວິດບໍ່ຈະເລີນກ້າວໜ້າ ຫາກິນຍາກ

6. ຫ້າມກົ້ມເບິ່ງລອດວ່າງຕົນເອງເມື່ອເວລາໄປງານສົບ ເພາະທ່ານອາດຈະເຫັນຜີໄດ້

7. ຢ່າຫຼິ້ນຢຽບເງົາຕົວເອງຕອນກາງຄືນ ເພາະຈະເຮັດໃຫ້ເກີດລາງຮ້າຍ

8. ຫ້າມເຄາະໝໍ້ເຂົ້າ, ເຄາະຖ້ວຍ, ບ່ວງ ໃນເວລາກິນເຂົ້າ ເພາະພຣະແມ່ໂພສົດຈະເສຍໃຈ ຈະບໍ່ພໍໃຈ ເຮັດນາຄັ້ງຕໍ່ໄປຈະບໍ່ເກີດໝາກອອກຜົນ ການທຳມາຫາກິນກໍ່ຍາກລຳບາກ.

9. ຫ້າມລ້ຽງແມວຈຳນວນ 5 ຕົວ ຫຼື ລ້ຽງໝາຈຳນວນ 6 ຕົວ ເພາະຈະເຮັດໃຫ້ຄົນໃນເຮືອນທຸກຈົນ ຫາກິນຍາກລຳບາກ.

10. ຫ້າມຍ່າງແຮງເພາະຈະເຮັດໃຫ້ຜີບ້ານຜີເຮືອນຕື່ນຕົກໃຈ ຢູ່ບໍ່ມີຄວາມສຸກແລ້ວຈະໜີໄປຢູ່ບ່ອນອື່ນ ບໍ່ຢູ່ຄຸ້ມຄອງເຈົ້າຂອງເຮືອນ.

11. ຫ້າມຕັດຜົມວັນພຸດ ຫ້າມສະຜົມວັນພະຫັດ

12. ຫ້າມເຜົາຜີຕາຍວັນສຸກ ເພາະຈະເຮັດໃຫ້ຄົນທີ່ຢູ່ບໍ່ມີຄວາມສຸກ ມີແຕ່ຄວາມທຸກຫມົ່ນຫມອງ

13. ຫ້າມນຸ່ງຊຸດດຳໄປຢ້ຽມຢາມຄົນປ່ວຍເພາະມັນສະແດງເຖິງຄວາມທຸກໂສກເສົ້າ

14. ຫ້າມຕັດເລັບຕີນເລັບມືຕອນຄ່ຳໃນເຮືອນ ເພາະຈະເຮັດໃຫ້ເຮືອນມີຄວາມເດືອດຮ້ອນ

15. ຫ້າມສາວໂສດຮ້ອງເພງໃນຄົວ ເພາະເຊື່ອວ່າຈະໄດ້ຜົວເຖົ້າ ຫລື ຫາຜົວບໍ່ໄດ້.

16. ໃນເຮືອນບໍ່ຄວນມີຮູບປັ້ນຍັກຫລືຮູບຍັກເພາະຈະເຮັດໃຫ້ຄົນໃນເຮືອນຜິດຖຽງກັນ.