ງານວິໄຈທຳອິດທີ່ພົບວ່າ ຢາສູບໄຟຟ້າ ສ່ຽງເປັນມະເຮັງ ສູງກວ່າຢາສູບທຳມະດາ 2,2 ເທົ່າ

ລາຍງານທີ່ກ່າວເຖິງນີ້ ຕີພິມໃນວາລະສານມະເຮັງຂອງໂລກ ໃນເດືອນກຸມພາ 2022 ບົດລາຍງານການວິໄຈພົບວ່າ ສູບ ຢາສູບໄຟຟ້າ ສ່ຽງເປັນມະເຮັງ ສູງກວ່າຢາສູບທຳມະດາ 2,2 ເທົ່າ ສ່ຽງເປັນມະເຮັງປາກມົດລູກຫຼາຍກວ່າ 8 ເທົ່າ ມະເຮັງເມັດເລືອດຂາວ 7 ເທົ່າ ມະເຮັງຄໍຫອຍ 4 ເທົ່າ ແລະ ມະເຮັງຜິວໜັງ 3 ເທົ່າ ໃຊ້ເວລາພຽງ 10 ປີທໍ່ນັ້ນ ທຽບໃສ່ຢາສູບທຳມະດາທີ່ໃຊ້ເວລາເກືອບ 100ປີ ຈຶ່ງຄົ້ນພົບວ່າມີລາຍງານພາໃຫ້ເກີດເປັນມະເຮັງປອດ

ອາຍຸສະເຫຼ່ຍຂອງຜູ້ສູບຢາໄຟຟ້າໄດ້ຮັບການບົ່ງມະຕິວ່າເປັນມະເຮັງ ແມ່ນ 45ປີ ເມື່ອທຽບກັບອາຍຸສະເຫຼ່ຍການເປັນມະເຮັງຂອງຜູ້ສູບຢາທຳມະດາແມ່ນ 63ປີ ງານວິໄຈນີ້ ຖືເປັນຄັ້ງທຳອິດທີ່ໃຊ້ຄວາມຮູ້ທາງລະບາດວິທະຍາສຶກສາຄວາມສຳພັນຂອງການສູບຢາສູບໄຟຟ້າ ກັບການເກີດມະເຮັງໃນຄົນ

ທີ່ໜ້າຕົກໃຈແມ່ນ ຢາສູບໄຟຟ້າໃຊ້ກັນມາພຽງ 10 ກວ່າປີ ເທົ່ານັ້ນ ກໍຮູ້ວ່າ ເພີ່ມຄວາມສ່ຽງໃນການເກີດມະເຮັງ ເມື່ອທຽບກັບຢາສູບທຳມະດາ ທີ່ໃຊ້ເວລາຍາວນານເປັນ 100ປີ

ທ່ານ ສາສະດາຈານ ດຣ. ປະກິດ ວາທີສາທົກກິດ ເລຂາທິການກິດຕິມະສັກ ມູນລະນິທິປຸກລະດົມເພື່ອການບໍ່ສູບຢາ ປະເທດໄທ ກ່າວວ່າ “ງານວິໄຈໄດ້ສະແດງໃຫ້ເຫັນເຖິງການສູບຢາໄຟຟ້າ ສ່ຽງຕໍ່ການເກີດມະເຮັງຕັ້ງແຕ່ອາຍຸຍັງນ້ອຍ ທີ່ສໍາຄັນ ທຸລະກິດຢາສູບ ໄດ້ເລັ່ງເປົ້າໝາຍໃສ່ກຸ່ມຄົນອາຍຸນ້ອຍ ກໍ່ໃຫ້ເກີດບັນຫາການເສບຕິດຢາສູບໄຟຟ້າໃນເດັກ ແລະ ເຍົາວະຊົນ ຂື້ນໃນຫຼາຍປະເທດຕ່າງໆ ເຊັ່ນ

ອັງກິດທີ່ມີກົດໝາຍຄວບຄຸມເຄັ່ງຄັດ ຍັງພົບວ່າ ເດັກອາຍຸຕໍ່າກວ່າ 18 ປີ ສູບຢາໄຟຟ້າເພີ່ມຂຶ້ນ 2 ເທົ່າ ທັງທີ່ມີກົດໝາຍຫ້າມຂາຍໃຫ້ຄົນອາຍຸຕໍ່າກວ່າ 18 ປີ ເຮັດໃຫ້ແພດໝໍໃນອັງກິດອອກມາເຕືອນວ່າ ປັນຫາການສູບຢາໄຟຟ້າຂອງເດັກນ້ອຍອັງກິດ ກາຍເປັນໄພພິບັດທາງສາທາລະນະສຸກ ເດັກທີ່ສົນໃຈການສູບຢາໄຟຟ້າສ່ວນໜຶ່ງເກີດຈາກຄວາມເຂົ້າໃຈຜິດວ່າ

ຢາສູບໄຟຟ້າບໍ່ອັນຕະລາຍ ບໍ່ເສບຕິດ ລວມເຖິງຮູບລັກສະນະທີ່ທັນສະໄໝ ໜ້າສົນໃຈ ມີກິ່ນຫອມ ແລະ ໂຄສະນາຊວນເຊື່ອທາງສື່ອອນໄລ ເຮັດໃຫ້ເດັກຢາກຮູ້ ຢາກລອງ ສົ່ງຜົນຕໍ່ການເສບຕິດຢາສູບໄຟຟ້າ ແລະ ເພີ່ມຄວາມເຂັ້ມຂຸ້ນຂອງສານນິໂກຕິນທີ່ເປັນສານເສບຕິດອັນຕະລາຍ

ຄວາມຈຳເປັນຢ່າງຮີບດ່ວນແມ່ນ ການໃຫ້ຄວາມຮູ້ ຄວາມເຂົ້າໃຈທີ່ຖືກຕ້ອງແກ່ສັງຄົມ ກ່ຽວກັບຢາສູບໄຟຟ້າ ໂດຍສະເພາະ ເດັກນ້ອຍ ແລະ ໄວລຸ້ນ ສ້າງຄວາມຮ່ວມມືກັນສະໜັບສະໜູນໃຫ້ມີການຈັດຕັ້ງປະຕິບາດມາດຕະການຫ້າມຢາສູບໄຟຟ້າ ແລະ ປາບປາມຢ່າງຈິງຈັງ

ອ້າງອິງ: bit.ly/3JbXn9E