ບົດຖະແຫຼ່ງຂ່າວ ມາດຕະການດຳເນີນການດ່ວນ ຈາກ ບໍລິສັດ ເບຍລາວ ຫຼັງຈາກພົບພະນັກງານ 5 ຄົນຕິດເຊື້ອໂຄວິດ

ຫຼັງຈາກທີ່ພົບຜູ້ຕິດເຊື້ອໃນຊຸມຊົນຢູ່ນະຄອນຫຼວງວຽງຈັນ ໃນວັນທີ 25 ສິງຫາ 2021 ເຊີ່ງໃນຈໍານວນຜູ້ຕິດເຊື້ອໃນ ແມ່ນເປັນພະນັກງານຂອງບໍລິສັດເບຍລາວ ຈໍານວນ 5 ຄົນ

ໂດຍລ່າສຸດ, ບໍລິສັດເບຍລາວ ໄດ້ອອກຖະແຫຼງການມາດຕະການດຳເນີນການດ່ວນ ໂດຍມີເນື້ອໃນວ່າ: ໃນມື້ວານນີ້, ບໍລິສັດເບຍລາວໄດ້ຮັບແຈ້ງວ່າ ໜຶ່ງໃນພະນັກງານຂອງພວກເຮົາໄດ້ສໍາພັດທາງອ້ອມກັບກໍລະນີຕິດເຊື້ອທີ່ ເມືອງໄຊທານີ ແລະ ກວດພົບເຊື້ອພະຍາດ COVID-19. ຜ່ານການຕິດຕາມ ແລະ ສະກັດກັ້ນຢ່າງເຂັ້ມງວດ, ພວກເຮົາສາມາດລະບຸ ແລະ ແຍກປ່ຽວພະນັກງານຜູ້ທີ່ມີຄວາມສ່ຽງສໍາພັດໃກ້ຊິດ ອອກ ແລະ ມີການກວດຫາເຊື້ອພະຍາດທັນທີ, ເຊິ່ງພະນັກງານຜູ້ທີ່ຕິດເຊື້ອທັງໝົດແມ່ນໄດ້ຮັບການສັກວັກຊີນຄົບສອງເຂັ້ມແລ້ວ

ພ້ອມທັງລະບຸວ່າ: ພະນັກງານຜູ້ທີ່ຕິດເຊື້ອ ໄດ້ມີການປະຕິດບັດຕາມຂັ້ນຕອນທີ່ຈໍາເປັນໃນການແຍກປ່ຽວຕົນເອງ ລວມເຖິງສະມາຊິກໃນຄອບຄົວທັນທີ ພາຍຫຼັງທີ່ໄດ້ຮູ້ວ່າຕົນເອງມີຄວາມສ່ຽງ ຫຼື ມີອາການ. ຜູ້ຕິດເຊື້ອທຸກຄົນແມ່ນກໍາລັງໄດ້ຮັບການປິ່ນປົວຢ່າງໃກ້ຊິດໃນສະຖານທີ່ທີ່ພາກລັດໄດ້ຈັດສັນໄວ້. ນີ້ແມ່ນເຫດການຄັ້ງທໍາອິດທີ່ພະນັກງານຂອງບໍລິສັດກວດພົບເຊື້ອ COVID-19. ຄະນະຜູ້ບໍລິຫານໄດ້ເອົາໃຈໃສ່ຢ່າງເຕັມທີ່ໃນການເບິ່ງແຍງ ແລະ ປົກປ້ອງພະນັກງານ ແລະ ຄອບຄົວ.

 

ບໍລິສັດ ເບຍລາວ ໄດ້ປະຕິບັດຕາມຄໍາສັ່ງຂອງລັດຖະບານຢ່າງເຂັ້ມງວດ ເພື່ອຄວບຄຸມ ແລະ ປ້ອງກັນການແຜ່ລະບາດຂອງເຊື້ອພະຍາດ COVID-19 ແລະ ປະຕິບັດຕາມແນວທາງຂອງອົງການອະນາໄມໂລກ, ມາຮອດວັນທີ 25/08/2021, 98%
ຂອງພະນັກງານທັງໝົດໃນບໍລິສັດໄດ້ຮັບການສັກວັກຊີນຄົບຕາມຈໍານວນ.

 

ທາງບໍລິສັດໄດ້ດຳເນີນການເພື່ອສະກັດກັ້ນ ແລະ ຈຳກັດການແຜ່ລະບາດທັນທີ ໂດຍການຂ້າເຊື້ອໃນພື້ນທີ່ເຮັດວຽກຢ່າງທົ່ວເຖິງ ແລະ ສືບຕໍ່ດຳເນີນນະໂນບາຍໃນການຄວບຄຸມເຊື້ອພະຍາດ COVID-19 ຢ່າງເຂັ້ມງວດ ພ້ອມທັງແຍກປ່ຽວ ແລະ ໃຫ້ພະນັກງານຄົນອື່ນໆທີ່ສໍາພັດໃກ້ຊິດກັບກໍລະນີຕິດເຊື້ອໄປກວດຫາເຊື້ອພະຍາດຕໍ່ໄປ.

ນອກຈາກນີ້, ບໍລິສັດເບຍລາວຍັງໄດ້ລະບຸຕື່ມວ່າ: ພວກເຮົາຂໍຢັ້ງຢືນກັບລູກຄ້າ ແລະ ຜູ້ບໍລິໂພກຂອງພວກເຮົາວ່າ ຜະລິດຕະພັນຂອງພວກເຮົາແມ່ນມີຄຸນະພາບສູງ ແລະ ປອດໄພຕໍ່ການບໍລິໂພກ 100% ດ້ວຍໂຮງຜະລິດທີ່ທັນສະໄໝລະດັບໂລກ ແລະ ການຄວບຄຸມດ້ານສຸຂະພາບ ແລະ ຄວາມປອດໄພທີ່ເຂັ້ມງວດ

View Comments

Leave a Reply

Your email address will not be published. Required fields are marked *

ກະລຸນາຫ້າມຄັດລອກບົດຄວາມກ່ອນໄດ້ຮັບອະນຸຍາດ