ໃນຊ່ວງວິກິດການແຜ່ລະບາດ ຂອງພະຍາດ ໂຄວິດ – 19 ໃນຮອບນີ້ ພະແນກອຸດສາຫະກຳ – ການຄ້າແຂວງ ບໍ່ແກ້ວ ກໍ່ໄດ້ອອກແຈ້ງການຄວບຄຸມລາຄາສິນຄ້າ ເພື່ອບໍ່ໃຫ້ຊາວຄ້າຂາຍສວຍໂອກາດຂຶ້ນລາຄາສິນຄ້າ ໜວດສະບຽງອາຫານປະເພດ ເຂົ້າ, ຊີ້ນສັດ, ປາ, ໄຂ່ ແລະ ສິນຄ້າອຸປະໂພກ – ບໍລິໂພກ ປະເພດອື່ນໆ ສູງເກີນກວ່າລາຄາທີ່ຈຳໜ່າຍໃນໄລຍະປົກກະຕິ.

ເພື່ອຮັບປະກັນຕໍ່ການສະໜອງສິນຄ້າພາຍໃນແຂວງ ໃຫ້ພຽງພໍກັບຄວາມຕ້ອງການບໍລິໂພກຊົມໃຊ້ ໂດຍສະເພາະແມ່ນການສະໜອງໃນໄລຍະທິ່ມີການແຜ່ລະບາດ ຂອງພະຍາດ ໂຄວິດ – 19 ເຊັ່ນ:

ໄຂ່ໄກ່ ລາຄາຂາຍສຸງສຸດບໍ່ໃຫ້ເກີນ 38.000 ກີບ/ ແຕະ, ເຂົ້າສານ ບໍໃຫ້ເກີນ 12.000 ກີບ/ ກິໂລ, ຊີ້ນໝູບໍ່ໃຫ້ເກີນ 55.000 ກີບ/ ກິໂລ, ຊີ້ນງົວ – ຄວາຍ ບໍ່ໃຫ້ເກີນ/ 75.000 ກີບ/ ກິໂລ, ປານິນ ບໍ່ໃຫ້ເກີນ 28.000 ກີບ/ ກິໂລ, ປາດຸກ ບໍ່ໃຫ້ເກີນ 26.000 ກີບ/ ກິໂລ.

ແຕ່ມາຮອດປະຈຸບັນ ຕາມຫາງສຽງຂອງປະຊາຊົນສ່ວນໃຫຍ່ພາຍໃນເມືອງ ໃຫ້ຮູ້ວ່າ: ຍັງມີບັນດາຊາວຄ້າຂາຍຈໍານວນໜຶ່ງໄດ້ສວຍໂອກາດຂຶ້ນລາຄາສິນຄ້າສູງເກີນກວ່າລາຄາປົກກະຕິ ຫຼື ລາຄາທີ່ພະແນກອຸດສາຫະກຳ – ການຄ້າແຂວງກຳນົດ ຊາວຄ້າຂາຍບາງຄົນກໍ່ອ້າງເຫດຜົນວ່າ ສິນຄ້າທີ່ຊື້ມາຈາກຜູ້ປະກອບການຂາຍສົ່ງໃນໄລຍະທີ່ມີການແຜ່ລະບາດ ຂອງພະຍາດ ໂຄວິດ – 19

ແມ່ນແພງກວ່າປົກກະຕິ ດັ່ງນັ້ນ ຈຶ່ງຈຳເປັນຕ້ອງຂາຍແພງຕາມລາຄາຕົ້ນທຶນທີ່ຊືິ້ມາ ເຊິ່ງໃນຄວາມເປັນຈິງແລ້ວ ລາຄາຂອງຜູ້ຂາຍສົ່ງກໍຍັງເປັນລາຄາປົກກະຕິ ບໍ່ໄດ້ຂຶ້ນລາຄາແຕ່ຢ່າງໃດ.

ນອກຈາກນັ້ນ ກໍ່ຍັງມີຊາວຄ້າຂາຍຈໍານວນໜຶ່ງໄດ້ສວຍໂອກາດລັກລອບນຳເຂົ້າສິນຄ້າຈາກປະເທດເພື່ອນບ້ານໃກ້ຄຽງ ມາກັກຕູນໄວ້ ເພື່ອນໍາມາຂາຍໃນລາຄາທີ່ແພງໃນໄລຍະນີ້ ດັ່ງທີ່ເຈົ້າໜ້າທີ່ໄດ້ຍຶດສິນຄ້າທີ່ຊາວຄ້າຂາຍຈໍານວນໜຶ່ງໄດ້ລັກລອບນໍາເຂົ້າບໍ່ຖືກຕ້ອງ ໃນໄລຍະມີເລີ່ມມີການແຜ່ລະບາດ ຂອງພະຍາດ ໂຄວິດ – 19 ໃນຮອບນີ້ໃໝ່ໆ.

ຕໍ່ບັນຫາດັ່ງກ່າວ ຈຶ່ງຂໍຮຽກຮ້ອງມາຍັງຊາວຄ້າຂາຍພາຍໃນເມືອງ ໃຫ້ເຫັນໃຈກັນໃນຍາມທີ່ບ້ານເມືອງ ໄດ້ປະສົບກັບຄວາມຫຍູ້ງຍາກທາງດ້ານເສດຖະກິດ ແລະ ດ້ານອື່ນໆ ອັນເກີດຈາກການແຜ່ລະບາດ ໂຄວິດ – 19 ເພາະບັນຫາໃນດ້ານຕ່າງໆທີ່ພວກເຮົາ ປະຊາຊົນສ່ວນໃຫຍ່ຈະປະສົບຢູ່ໃນປະຈຸບັນ ກໍ່ຍັງຫຍຸ້ງຍາກຢູ່ແລ້ວ ຍັງຈະມາປະສົບກັບບັນຫາປາກທ້ອງ ກໍ່ຄືບັນຫາລາຄາສິນຄ້າທີ່ມີຄວາມຈໍາເປັນໃນການດຳລົງຊີວິດປະຈໍາວັນທີ່ສູງເກິນໄປອີກ.

ໃນໄລຍະທີ່ບ້ານເມືອງປະສົບກັບວິກີດແບບນີ້ ບໍ່ຄວນມີເຫດຜົນ ຂໍ້ອ້າງໃດໆ ໃນການສວຍໂອກາດຂຶ້ນລາຄາສິນຄ້າສຳລັບຊາວຄ້າຂາຍທີ່ເຫັນແກ່ຜົນປະໂຫຍດສ່ວນຕົວເກີນໄປ ໂດຍບໍ່ຄຳນຶງເຖິງວິກິດຄວາມຫຍູ້ງຍາກທີ່ພີ່ນ້ອງໃນວົງຄະນາຍາດຮ່ວມຊາດໄດ້ປະສົບຢູ່ໃນປະຈຸບັນ.

ທີ່ມາ: ໜັງສືພິມແຂວງບໍ່ແກ້ວ