ແຂວງຈຳປາສັກ ອອກມາດຕະການປະຕິບັດຕໍ່ຜູ້ລັກລອບເຂົ້າເມືອງ ພ້ອມໃຫ້ຮັບຜິດຊອບຄ່າໃຊ້ຈ່າຍເອງ

ແຂວງຈຳປາສັກ ອອກແຈ້ງການເລື່ອງການປະຕິບັດມາດຕະການຕໍ່ຜູ້ລັກລອບເຂົ້າເມືອງແບບຜິດກົດໝາຍ ວັນທີ 16 ເມສາ 2021 ເພື່ອຮັບປະກັນການປະຕິບັດມາດຕະການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ໃນໄລຍະທີ່ມີການລະບາດແຮງຢູ່ປະເທດໃກ້ຄຽງ ເຊິ່ງໃນແຕ່ລະວັນມີສະພາບແຮງງານລາວລັກລອບເຂົ້າເມືອງແບບຜິດກົດຫມາຍ ຜ່ານຊ່ອງທາງທຳມະຊາດ ແລະ ບໍ່ໄດ້ຜ່ານດ່ານຊາຍແດນທີ່ທາງຄະນະສະເພາະກິດຂັ້ນແຂວງອະນຸຍາດ ຊຶ່ງມີຄວາມສ່ຽງສູງທີ່ຈະນໍາເອົາເຊື້ອພະຍາດເຂົ້າມາແຜ່ລະບາດໃນຊຸມຊົນ ແລະ ມີຄວາມຫຍຸ້ງຍາກໃນການດວບຄຸມການລະບາດຂອງພະຍາດ ໂຄວິດ-19 ຢູ່ແຂວງຈໍາປາສັກ. ສະນັ້ນ. ເຈົ້າແຂວງຈໍາປາສັກ ອອກແຈ້ງການດັ່ງນີ້:

1. ໃຫ້ອົງການປົກຄອງນະດອນປາກເຊ ແລະ 9 ເມືອງ ແຈ້ງໃຫ້ບັນດາບ້ານ, ກຸ່ມບ້ານ ໃນຂອບເຂດຄວາມຮັບຜິດຊອບຂອງຕົນ ເພື່ອແຈ້ງໃຫ້ຄອບຄົວ, ພໍ່ແມ່ປະຊາຊົນ ຮັບຊາບວ່າ: ຖ້າມີ ລູກ, ຫລານໃນຄອບຄົວມີການລັກລອບເຂົ້າມາຈາກຕ່າງປະເທດ ໂດຍບໍ່ຜ່ານດ່ານກວດກາຂອງເຈົ້າໜ້າທີ່ສະເພາະກິດ ໃຫ້ຮີບຮ້ອນລາຍງານໂດຍດ່ວນໃຫ້ອົງການປົກຄອງບ້ານ, ກຸ່ມບ້ານ; ພ້ອມນັ້ນ ໃຫ້ອົງການປົກຄອງບ້ານ ລາຍງານໃຫ້ໂດຍກົງໃຫ້ ອົງການປົກຄອງນະຄອນ ຫຼື ເມືອງ ( ຄະນະສະເພາະກິດຂັ້ນເມືອງ ) ຮັບຊາບໂດຍໄວ.

2. ໃຫ້ອົງການປົກຄອງນະຄອນ/ເມືອງ (ຄະນະສະເພາະກິດຂັ້ນນະຄອນ/ເມືອງ > ຮີບຮ້ອນນໍາເອົາຜູ້ກ່ຽວເຂົ້າສູນຈຳກັດບໍລິເວນຂອງເມືອງ ພ້ອມໃຫ້ທິມງານແພດຂອງເມືອງເກັບຕົວຢ່າງແລ້ວສົ່ງໃຫ້ ຄະນະສະເພາະກິດຂັ້ນແຂວງ (ໂຮງໝໍແຂວງ) ເພື່ອກວດຊອກຫາເຊື້ອພະຍາດ ໂຄວິດ-19.

3. ຫ້າມບໍ່ໃຫ້ຄອບຄົວ, ພໍ່ແມ່, ຍາດພີ່ນ້ອງ ປິດບັງຂໍ້ມູນຜູ້ທີ່ລັກລອບເຂົ້າມາ ແລະ ບໍ່ໃຫ້ຜູ້ລັກລອບໄປປ້ຽມຢາມຍາດຕິພີ່ນ້ອງພາຍໃນບ້ານ ຫາລື ເດິນທາງໄປສະຖານທີ່ອື່ນໆ, ຖ້າບໍ່ດັ່ງນັ້ນຈະໄດ້ປະຕິບັດມາດຕະການຕາມລະບຽບກົດໝາຍ ຢ່າງເຂັ້ມງວດ ດັ່ງນີ້: 1) ຕ້ອງຮັບຜິດຊອບຈ່າຍຄ່າໄປຮັບ-ສົ່ງ ເຂົ້າມາຢູ່ສູນຈໍາກັດບໍລິເວນ ແລະ ລວມທັງຕ່ງອາຫານຂອງຕົນໃນແຕ່ລະມື້. 2) ຕ້ອງຮັບຜິດຊອບຈ່າຍຄ່າກວດຫາພະຍາດ ໂຄວິດ-19 ມູນຄ່າ 650.000 ກີບຕໍ່ຄັ້ງ, ລວມທັງຄ່າປິ່ນປົ່ວຕົນເອງ ໃນກໍລະນີຫາກຜົນກວດຢັ້ງຢືນວ່າຜູ້ກ່ຽວ ຫາກຕິດເຊື້ອພະຍາດ ໂຄວິດ-19. 3) ໃຫ້ເຈົ້າຫນ້າທີ່ ປກສ ປະຕິບັດວິໄນ, ປັບໃຫມຕາມກົດຫມາຍ ແລະ ລະບຽບການຢ່າງເຂັ້ມງວດ ຕໍ່ຜູ້ລັກລອບເຂົ້າປະເທດແບບຜິດກົດໝາຍ ຫຼັງຈາກກັກບໍລິເວນຢູ່ສູນກັກກັນຄົບ 14 ວັນແລ້ວ.
ດັ່ງນັ້ນ, ຈິ່ງແຈ້ງມາຍັງທຸກພາກສ່ວນເພື່ອພ້ອມກັນຈັດຕັ້ງປະຕິບັດ ຕາມເນື້ອໃນແຈ້ງການສະບັບນີ້ຢ່າງເຂັ້ມງວດ.

View Comments

Leave a Reply

Your email address will not be published. Required fields are marked *

ກະລຸນາຫ້າມຄັດລອກບົດຄວາມກ່ອນໄດ້ຮັບອະນຸຍາດ