ທ້າຍປີນີ້ ທາງລົດໄຟຈະສຳເລັດແລ້ວ ປະຊາຊົນລາວຈະໄດ້ໃຊ້ບໍລິການລົດໄຟເປັນທາງການ

ບໍລິສັດລົດໄຟລາວ – ຈີນ ຈໍາກັດ ໃຫ້ຮູ້ວ່າ:​ ໃນເດືອນ ສິງຫາ 2021 ທີ່ຈະມາເຖິງນີ້ ບໍລິສັດຈະໄດ້ນໍາເອົາລົດໄຟມາແຕ່ຈີນເພື່ອກຽມແລ່ນທົດລອງ ແລະ ເປີດນໍາໃຊ້ຢ່າງເປັນທາງການໃນທ້າຍປີ 2021 ນີ້ຊຶ່ງມີຄວາມຍາວທັງໝົດ 422,4 ກິໂລ ແມັດ ປະກອບມີ 32 ສະຖານີ. ສະເພາະພະນັກງານລາວທີ່ຈະເຮັດວຽກຢູ່ໂຄງການດັ່ງກ່າວຊຶ່ງເປັນຊຸດ ທໍາອິດ ໃນຕໍາແໜ່ງງານກ່ຽວກັບຜູ້ຂັບລົດໄຟ, ກົນຈັກ, ຜູ້ປະຕິບັດງານລົດໄຟ, ແລະ ຜູ້ເບິ່ງແຍງຮັກສາທາງລົດໄຟໄດ້ມີການສໍາເລັດການຝຶກອົບຮົມດ້ານທິດສະດີຢູ່ສປປ ລາວ ແລ້ວ ແລະ ກໍາລັງສືບຕໍ່ຝຶກອົມຮົມຕົວຈິງຢູ່ປະເທດຈີນໃຫ້ສໍາເລັດກ່ອນຈະມາປະຕິບັດໜ້າທີ່ຢູ່ ໂຄງການດັ່ງກ່າວ.

ບໍລິສັດລົດໄຟລາວ – ຈີນ ຈໍາກັດ ໃຫ້ຮູ້ຕື່ມອີກວ່າ:​ ໂຄງການການກໍ່ສ້າງທາງລົດໄຟດັ່ງກ່າວໄດ້ ເລີ່ມລົງມືກໍ່ສ້າງມາແຕ່ທ້າຍເດືອນທັນວາ 2016 ໂດຍມີໄລຍະການກໍ່ສ້າງ 5 ປີ ຊຶ່ງຮອດປັດຈຸບັນສໍາເລັດແລ້ວຫຼາຍກວ່າ 80% ໂດຍມີມູນຄ່າການກໍ່ສ້າງ ຫຼາຍກວ່າ 37 ຕື້ ຢວນ.ທາງລົດໄຟລາວ – ຈີນແມ່ນສ່ວນໜຶ່ງ ຂອງເສັ້ນທາງລົດໄຟໃນພາກພື້ນ ທີ່ເຊື່ອມຕໍ່ລະຫວ່າງເມືອງຄຸນໝິງ ຂອງຈີນ ກັບ ສິງກະໂປ ຜ່ານລາວ, ໄທ ແລະ ມາເລເຊຍ.

ຕາມຂ່າວສານຂປລ. ໃນວັນທີ 30 ມີນາ 2021, ຄະນະສື່ມວນຊົນລາວ ແລະ ຈີນ ໄດ້ລົງຢ້ຽມຢາມ ໄຊ້ງານກໍ່ສ້າງ ແລະ ການວາງລາງລົດໄຟ ບໍລິສັດທາງລົດໄຟເລກ 2 ສປ ຈີນ, ໂດຍໃຫ້ການຕ້ອນຮັບຂອງ ທ່ານ ຫູ ປິນ ຫົວໜ້າບັນຊາການ ແລະ ວິສາວະກອນລະດັບສູງ ບໍລິສັດທາງລົດໄຟເລກ 2 ສປ ຈີນ. ຈຸດປະສົງການຢ້ຽມຢາມໃນຄັ້ງນີ້, ເພື່ອເບິ່ງຄວາມຄືບໜ້າ ຂອງໂຄງການກໍ່ສ້າງທາງລົດໄຟລາວ-ຈີນ.

ທ່ານ ຫູ ປິນ ແຈ້ງໃຫ້ຮູ້ວ່າ: ປັດຈຸບັນ, ການວາງລາງລົດໄຟແມ່ນສຳເລັດ 80% ຍັງເຫລືອພຽງແຕ່ 20% ເທົ່ານັ້ນ, ຄາດວ່າຈະປູລາງລົດໄຟ ແຕ່ສະຖານີ ບ້ານໄຊ ເມືອງໄຊທານີ, ນະຄອນ ຫລວງວຽງຈັນ ຫາສະຖານີບໍ່ເຕັນຊາຍແດນລາວ-ຈີນ ໃຫ້ສຳເລັດພາຍໃນ ວັນທີ 30 ພຶດສະພາ 2021 ແລະ ຄາດວ່າໃນເດືອນສິງຫາ ທີ່ຈະມາເຖິງນີ້ ຈະນຳເອົາລົດໄຟມາແຕ່ສປ ຈີນ ແລະ ຈະເລີ່ມທົດລອງແລ່ນໃນທ້າຍປີ 2021 ນີ້.

ທ່ານ ໂພສີ ແກ້ວມະນີວົງ ຕາງໜ້າຄະນະສື່ມວນຊົນ ໄດ້ກ່າວວ່າ: ສປປ ລາວ ຈາກເປັນປະ ເທດທີ່ບໍ່ມີທາງອອກສູ່ທະເລ ໄດ້ກາຍເປັນປະເທດທີ່ມີເສັ້ນທາງແຫ່ງມິດຕະພາບລາວ-ຈີນ ເປັນເສັ້ນ ທາງເຊື່ອມຕໍ່ໃນພາກພື້ນ ແລະ ສ້າງສາພັດທະນາປະເທດຊາດໃຫ້ຈະເລີນກ້າວໜ້າຕໍ່ໄປ ແລະ ຫວັງວ່າໂຄງການນີ້, ຈະເພີ່ມຮັດແໜ້ນຄວາມສາມັກຄີມິດຕະພາບ ແລະ ຄວາມເຂົ້າອົກເຂົ້າໃຈ ຂອງປະຊາຊົນສອງຊາດ ລາວ-ຈີນ ໃຫ້ແໜ້ນແຟ້ນຍິ່ງຂຶ້ນ.

ທ່ານ ຫູ ປິນ ກ່າວຕື່ມວ່າ: ຂ້າພະເຈົ້າ ໃນນາມຜູ້ຮັບຜິດຊອບໂຄງການ ຕາງໜ້າໃຫ້ພະແນກປູລາງລົດໄຟໂຄງການທາງລົດໄຟ ບໍ່ເຕັນ-ນະຫລວງວຽງຈັນ ຂໍໃຫ້ຄໍາໝັ້ນສັນຍາຕໍ່ສັງຄົມວ່າ: ຈະຈັດຕັ້ງປະຕິບັດນິຕິກຳ ລະບຽບກົດໝາຍ ແລະ ມາດຕະຖານຕ່າງໆຢ່າງເຂັ້ມງວດ, ປະຕິບັດກົດລະບຽບຄວາມປອດໄພ ການຜະລິດຢ່າງເຄັ່ງຄັດ, ຕື່ນຕົວ ແລະ ຍິນຍອມຕໍ່ການກວດກາ ຕາມລະບຽບກົດ ໝາຍຂອງໜ່ວຍງານຕິດຕາມກວດກາ ພ້ອມຮັບປະກັນດ້ານຄວາມປອດໄພຕ່າງໆ.

View Comments

Leave a Reply

Your email address will not be published. Required fields are marked *

ກະລຸນາຫ້າມຄັດລອກບົດຄວາມກ່ອນໄດ້ຮັບອະນຸຍາດ