ປະຈຸບັນທົ່ວແຂວງອຸດົມໄຊຍັງມີ 33 ບໍລິສັດ 36 ກິດຈະການທີ່ຍັງສືບຕໍ່ດໍາເນີນກິດຈະການຂຸດຄົ້ນ ແລະປຸງແຕ່ງແຮ່ທາດ.

່ທ່ານ ອາລຸນ ບຸນວິໄລ ຫົວຫນ້າພະແນກພະລັງງານ ແລະ ບໍ່ແຮ່ແຂວງອຸດົມໄຊເປີດເຜີຍຕໍ່ສື່ມວນຊົນໃນໂອກາດເຂົ້າຮ່ວມກອງປະຊຸມສະຫຼຸບຖອດຖອນບົດຮຽນ ການເຄື່ອນໄຫວວຽກງານປະຈໍາປີຂອງຂະແຫນງທໍລະນີສາດ ແລະ ແຮ່ທາດຈັດຂຶ້ນເມື່ອບໍ່ດົນມານີ້ທີ່ເມືອງວັງວຽງໃຫ້ຮູ້ວ່າ:

ປະຈຸບັນແຂວງອຸດົມໄຊ ໄດ້ສໍາເລັດການສໍາຫຼວດສ້າງແຜນທີ່ທໍລະນີສາດ-ແຮ່ທາດພື້ນຖານມາດຕາສ່ວນ 1/200.000 ໄດ້ສໍາເລັດ 100% ຂອງເນື້ອທີ່ທົ່ວແຂວງຊື່ງສາມາດຄົ້ນພົບຈຸດປະກັດແຮ່ທາດ ທັງຫມົດ 59 ຈຸດ, ມີ 11 ຊະນິດແຮ່ທາດ.

ປະຈຸບັນມີບໍລິສັດດໍາເນີນການຂຸດຄົ້ນ ແລະປຸງແຕ່ງແຮ່ທາດຢູ່ແຂວງອຸດົມໄຊທັງຫມົດ 33 ບໍລິສັດ, ໃນນັ້ນຂັ້ນແຂວງອະນຸຍາດ 26 ບໍລິສັດ ແລະຂັ້ນສູນກາງ ອະນຸຍາດຈໍານວນ 7 ບໍລິສັດມີເນື້ອທີ່ສໍາປະທານທັງຫມົດ 9.844 ກວ່າເຮັກຕາ, ສໍາລັບຂັ້ນແຂວງອະນຸມັດສ່ວນຫຼາຍຂຸດຄົ້ນ, ປຸງແຕ່ງແຮ່-ຫີນອຸດສາຫະກໍາກໍ່ສ້າງ (ຫຼືນປູນ, ຫີນຜາ) ບໍລິການສັງຄົມເພື່ອຮັບໃຊ້ໃຫ້ແກ່ການກໍ່ສ້າງພື້ນຖານໂຄງລ່າງ, ຕຶກ, ອາຄານ ແລະສະຖານທີ່ຕ່າງໆ

ໃນຂະນະທີ່ 7 ບໍລິສັດທີ່ສູນກາງ ອະນຸຍາດ,ມີ 11 ຈຸດສໍາປະທານເພື່ອຂຸດຄົ້ນ,ໃນນັ້ນປະກອບມືແຮ່ທອງແດງ 1 ຈຸດ,ແຮ່ເກືອ 1 ຈຸດ,ແຮ່ຊືນ-ສັງກະສີ 2 ຈຸດ,ແຮ່ຖ່ານຫີນ 1 ຈຸດ, ແຮ່ເຫຼັກ 3 ຈຸດ, ແຮ່ດິນໜຽວ 1 ຈຸດ, ແຮ່ຫີນປູນ1 ຈຸດ ແລະແຮ່ຄໍາ 1 ຈຸດ, ໃນເນື້ອທີ່ສໍາປະທານທັ້ງຫມົດ 9.763 ເຮັກຕາ,

ສໍາລັບການສົ່ງອອກສ່ວນຫຼາຍຍັງເປັນແຮ່ເຫຼັກຊື່ງປີ 2020 ສັງອອກໄປ ສປ ຈີນ ຈໍານວນ 140.000 ໂຕນ ມູນຄ່າ 9,6 ລ້ານກວ່າໂດລາ ແລະແຮ່ຄໍາຈໍານວນ 157.889,32 ກຣາມ ມູນຄ່າ 3.6 ລ້ານກວ່າໂດລາ.

ທ່ານ ອາລຸນ ບຸນວິໄລ ກ່າວອີກວ່າ:

ພະແນກພະລັງງານ ແລະ ບໍ່ແຮ່ແຂວງໄດ້ສົມທັບກັບກະຊວງພະລັງງານ ແລະ ບໍ່ແຮ່ລົງຕິດຕາມກວດກາບັນດາບໍລິສັດທີ່ກໍາລັງຂຸດຄົ້ນ ແລະປຸງແຕ່ງໃຫ້ເຂົ້າສູ່ລະບຽບໄດຍສະເພາະແມ່ນການປະເມີນປະລິມານການຂຸດຄົ້ນ-ການປຸງ ແຕ່ງເພື່ອສົ່ງອອກເພື່ອຫຼີກເວັ້ນການສົ່ງວັດຖຸດິບອອກໄປຕ່າງປະເທດ

ຊຶ່ງບັນດາບໍລິສັດຂຸດຄົ້ນຕ້ອງປຸງແຕ່ງເປັນຜະລິດຕະພັນສໍາເລັດຮູບ ຫຼື ເຄິ່ງສໍາເລັດຮູບກ່ອນສົ່ງອອກຊື່ງຜ່ານການປະເມີນເຫັນວ່າຍັງມີບາງບໍລິສັດຍັງຖືເບົາໃນການປະຕິບັດຕາມສັນຍາ ແລະລະບຽບກົດຫມາຍ ໂດຍໄດ້ສັ່ງໂຈະຊົ່ວຄາວ 7 ກິດຈະການ ແລະຍົກເລີກ 2 ກິດຈະການທີ່ບໍ່ປະຕິບັັັດຕາມສັນຍາ.
—————————
ແຫຼ໋ງຂໍ້ມູນ: ເສດຖະກິດສັງຄົມ
ລິ້ງຕົ້ນສະບັບ: https://bit.ly/381VF9e