ອົງການກວດສອບປະຈຳພາກເໜືອ ພົບເຫັນລາຍຮັບບໍ່ມອບ 71 ຕື້ກ່ວາກີບ

ໃນວັນທີ 25 ກຸມພາ 2021 ຜ່ານມາ ອົງການກວດສອບປະຈຳພາກເໜືອທີ່ແຂວງຫຼວງພະບາງໄດ້ຈັດກອງປະຊຸມສະຫຼຸບການຈັດຕັ້ງປະຕິບັດວຽກງານປະຈຳປີ 2020 ແລະ ວາງທິດທາງແຜນການປີ 2021.​

ໃນພິທີ ທ່ານ ຊົມຊື່ນ ໄຊເກີຢາຈົງຕົວ ປະທານອົງການກວດສອບປະຈໍາພາກເໜືອ ໄດ້ຂຶ້ນຜ່ານບົດສະຫຼຸບການເຄື່ອນໄຫວວຽກງານປະຈໍາປີ 2020 ໃຫ້ຮູ້ວ່າ: ໃນໄລຍະທີ່ຜ່ານມາອົງການກວດສອບປະຈໍາພາກເໜືອໄດ້ສ້າງຜົນສໍາເລັດ ແລະ ຜົນງານອັນພົ້ນເດັ່ນຫຼາຍດ້ານເປັນຕົ້ນແມ່ນສໍາເລັດການຈັດຕັ້ງປະຕິບັດແຜນການກວດສອບທັງໝົດ 21 ເປົ້າໝາຍ, ສໍາເລັດການກວດສອບບົດສະຫຼຸບຂາດຕົວ 8 ເປົ້າໝາຍລວມມີ 147 ຫົວໜ່ວຍ, ກວດສອບເອກະສານລາຍງານການເງິນຂອງລັດວິສາຫະກິດນ້ຳປະປາໄດ້ 7 ເປົ້າໝາຍ, ລົງເກັບກໍາຂໍ້ມູນໂຄງການລົງທຶນຂອງລັດ 1 ໂຄງການ ແລະ ສາມາດກວດສອບເຫັນລາຍຮັບເພີ່ມທີ່ບໍ່ໄດ້ມອບເຂົ້າງົບປະມານແຫ່ງລັດຈຳນວນ 71,72 ຕື້ກີບ, ກວດສອບເຫັນໜີ້ທີ່ຕ້ອງຮັບບໍ່ສາມາດເລັ່ງທວງໄດ້ 287,28 ຕື້ກີບ ແລະ ຈາກການຈ່າຍລວງໜ້າໃນລະບົບຄັງເງິນແຫ່ງຊາດປະຈຳແຂວງ (6 ແຂວງ) ມີ 95,09 ຕື້ກີບ, ຍອດເຫຼືອໃນບັນຊີເງິນຝາກກົມກອງບໍລິການວິຊາການສະສົມຮອດທ້າຍປີ 2019 ຈຳນວນ 5,14 ຕື້ກີບ.​

ສຳເລັດການດຳເນີນການກວດສອບ, ສະຫຼຸບສັງລວມຜົນການກວດສອບ ແລະ ເຊັນຮັບຮອງບົດບັນທຶກຜົນການກວດສອບ 15 ເປົ້າໝາຍ, ລົງເກັບກຳຂໍ້ມູນໂຄງການກໍ່ສ້າງຫໍວັດທະນະທໍາແຂວງຊຽງຂວາງໄດ້ສຳເລັດ, ໄດ້ດຳເນີນກອງປະຊຸມໃຫຍ່ຄັ້ງທີ II ໃນຂັ້ນຂອງຕົນ ແລະ ກອງປະຊຸມປະຈໍາປີ 2020 ສໍາເລັດ, ໄດ້ເອົາໃຈໃສ່ເລືອກເຟັ້ນເອົາພະນັກງານໄປຍົກລະດັບດ້ານທິດສະດີ-ການເມືອງ ແລະດ້ານວິຊາສະເພາະຢ່າງເປັນລະບົບ ແລະສໍາເລັດການປະເມີນຜົນງານປະຈຳປີ 2020

ແລະ ປະເມີນການແຂ່ງຂັນຍ້ອງຍໍຮັກຊາດ ແລະ ພັດທະນາພ້ອມນັ້ນຍັງໄດ້ມີການມອບໃບຍ້ອງຍໍຜູ້ທີ່ມີຜົນງານດີເດັ່ນທີ່ໄດ້ປະກອບສ່ວນເຫື່ອແຮງ ແລະ ສະຕິປັນຍາເຂົ້າໃນການເຄື່ອນໄຫວວຽກງານປະຈໍາປີ 2020 ຕື່ມອີກ.

ຂ່າວຈາກ: ເສດຖະກິດ-ສັງຄົມ
ສະບັບເຕັມ https://bit.ly/3q8x6Or

View Comments

Leave a Reply

Your email address will not be published. Required fields are marked *

ກະລຸນາຫ້າມຄັດລອກບົດຄວາມກ່ອນໄດ້ຮັບອະນຸຍາດ