ທ່ານ ຮສ.ດຣ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກໄດ້ກ່າວເມື່ອບໍ່ດົນມານີ້ວ່າ:​ ການປ້ອງກັນແຮງງານລາວທີ່ໄປຂາຍແຮງງານຢູ່ບັນດາປະເທດອອ້ມຂ້າງ ສປປ ລາວ ໂດຍສະເພາະປະເທດທີ່ຍັງມີການແຜ່ລະບາດຂອງພະຍາດໂຄວິດ-19 ນັ້ນຖືວ່າເປັນບັນຫາໃຫຍ່ທີ່ທາງຄະນະສະເພາະກິດ ຫຼື ພາກສ່ວນທີ່ກ່ຽວຂ້ອງຕ້ອງໄດ້ເອົາໃຈໃສ່ເປັນພິເສດໂດຍສະເພາະບັນດາແຂວງທີ່ມີຊາຍແດນຕິດກັບປະເທດເພື່ອນບ້ານຕ້ອງເພີ່ມທະວີການລາດຕະເວນ ເມື່ອພົບແລ້ວຕ້ອງເອົາຕົວມາກວດຫາເຊື້ອ ແລະ ນໍາຕົວໄປກັກກັນກ່ອນທີ່ຈະດໍາເນີນການຕາມລະບຽບກົດໝາຍບ້ານເມືອງ.

ທ່ານ ຮສ.ດຣ ພູທອນໄດ້ກ່າວຕື່ມວ່າ: ນອກນັ້ນຢາກໃຫ້ເນັ້ນຕິດຕາມພາກສ່ວນທີ່ກ່ຽວຂ້ອງເປັນຕົ້ນຜູ້ທີ່ພາລັກລອບເຂົ້າເມືອງແບບຜິດກົດໝາຍ, ບັນດາໂຮງແຮມ, ບ້ານພັກ, ຜຸ້ຂົນສົ່ງໂດຍສານ ຫຼື ຜູ້ອໍານວຍຄວາມສະດວກຕ່າງໆທີ່ເຂົ້າຄ່າຍໃນການກະທໍາຜິດກົດໝາຍ ແລະ ກະທໍາຜິດຕໍ່ລະບຽບທີ່ທາງຄະນະສະເພາະກິດວາງອອກ. ໃນໂອກາດບຸນປິໃໝ່ຊາວຫວຽດນາມ, ຊາວຈີນທີ່ຈະມາເຖິງນີ້ ອາດຈະມີການເຄື່ອນຍ້າຍແຮງງານຕ່າງປະເທດເຂົ້າອອກປະເທດແບບຜິດກົດໝາຍຈຶ່ງຮຽກຮ້ອງໃຫ້ເຈົ້າໜ້າທີ່ເອົາໃຈໃສ່ເປັນພິເສດໃນການປ້ອງກັນການລັກລອບເຂົ້າ-ອອກຕາມຊາຍແດນ.

ຂ່າວ: ວຽງຈັນທາຍ