ໜາແໜ້ນຕັ້ງແຕ່ເຊົ້າ..!!!ເປີດໃຊ້ເປັນທາງການ ທາງດ່ວນວຽງຈັນ-ວັງວຽງຂຶ້ນຟຣີ 3 ມື້

ທາງດ່ວນວຽງຈັນ ຫາ ເມືອງວັງວຽງນີ້ມີຈຸດເລີ່ມຕົ້ນທີ່ສາມແຍກສີເກີດເມືອງນາຊາຍທອງ ນະຄອນຫຼວງວຽງຈັນ ຜ່ານເມືອງໂພນໂຮງ, ເມືອງຫີນເຫີບ ແລະ ສິ້ນສຸດທີ່ເມືອງວັງວຽງແຂວງວຽງຈັນ, ມີມູນຄ່າການກໍ່ສ້າງຫຼາຍກວ່າ 1 ຕື້ໂດລາ, ຍາວປະມານ 109,9 ກິໂລແມັດ ແລະ ກວ້າງ 23 ແມັດ, ເປັນເສັ້ນທາງຄູ່ຂະໜານ, ມີ 4 ຊ່ອງທາງຈະລາຈອນ ແລະ 2 ແລວໄປ-ກັບ, ສ່ວນຄວາມໄວຢູ່ໃນລະດັບແຕ່ 80-100 ກິໂລແມັດ/ຊົ່ວໂມງ, ມີວົງວຽນຈຸດເຊື່ອມຕໍ່ເຂົ້າ-ອອກ 7 ຈຸດ, ອຸໂມງ 1 ແຫ່ງ (ເຂດພູພະນັງ), ຂົວ 45 ແຫ່ງ, ເຊິ່ງຂ້າມທາງເລກທີ 13 ເໜືອ 3 ຈຸດ, ຂ້າມທາງລົດໄຟ 4 ຈຸດ ແລະ ຂ້າມທາງເຂົ້າບ້ານ 23 ຈຸດ.

ເວລາການເປີດນຳໃຊ້ ພິທີທາງການ: ວັນທີ 20 ທັນວາ 2020, ຍ້ອນວ່າວັນດັ່ງກ່າວເປັນການຈັດງານພິທີເປີດນຳໃຊ້, ເວລາ 24:00 ໂມງ ວັນທີ 21ທັນວາ 2020 ເປັນຕົ້ນໄປຈື່ງສາມາດສັນຈອນຢູ່ທາງດ່ວນໄດ້, ເພື່ອເປັນການສະແດງຄວາມຂອບໃຈຕໍ່ທຸກພາກສ່ວນທີ່ໃຫ້ຄວາມສະໜັບສະໜູນແກ່ທາງດ່ວນນະຄອນຫຼວງວຽງຈັນ-ວັງວຽງ, ບໍລິສັດ ຮ່ວມທຶນພັດທະນາດ່ວນ ລາວ-ຈີນ ຈຳກັດ ຕົກລົງຈະບໍ່ເກັບຄ່າຜ່ານທາງໃນຊ່ວງໄລຍະ ເວລາ 0:00 ໂມງ ວັນທີ 21-ເວລາ 24:00 ໂມງ ວັນທີ23 ທັນວາ 2020.


.
ອີງຕາມຂໍ້ມູນຈາກບໍລິສັດຮ່ວມທຶນພັດທະນາລາວ-ຈີນຈໍາກັດ ຊຶ່ງເປັນບໍລິສັດລົງທຶນກ່ຽວກັບການກໍ່ສ້າງທາງດ່ວນວຽງຈັນ-ວັງວຽງໃຫ້ຮູ້ວ່າ: ການເກັບຄ່າບໍລິການຜ່ານທາງດ່ວນດັ່ງກ່າວແມ່ນ 8.000 ກີບຕໍ່ດ່ານ ຊຶ່ງລວມມີ 8 ດ່ານ (ລວມໄປກັບ 16 ດ່ານ) ນັບແຕ່ນະຄອນຫຼວງວຽງຈັນ ຫາ ເມືອງວັງວຽງ ແຂວງວຽງຈັນ.

ສິ່ງທີ່ຕ້ອງຮູ້ເພື່ອຄວາມປອດໄພໃນການຈະລາຈອນ ຄວາມໄວຈຳກັດໃນອຸມົງສູງສຸດບໍ່ໃຫ້ເກີນ 80 ກິໂລແມັດ/ຊົ່ວໂມງ, ຄວາມໄວໃນການຂັບຂີ່ເທີ່ງທາງດ່ວນແມ່ນປະຕິບັດຕາມປ້າຍຈະລາຈອນທີ່ຕິດຕັ້ງຕາມທາງດ່ວນ. ການຂັບຂີ່ເທີ່ງທາງດ່ວນມີການກວດຈັບຄວາມໄວ ແລະ ມີການປັບໃໝຍານພາຫະນະທີ່ນຳໃຊ້ຄວາມໄວເກີນກຳນົດຕາມລະບຽບທີ່ກ່ຽວຂ້ອງ;

ຄົນຍ່າງ, ພາຫະນະທີ່ຂັບເຄື່ອນດ້ວຍແຮງງານສັດ, ພາຫະນະທີ່ບໍ່ມີເຄື່ອງຈັກ, ລົດໄຖ, ລົດຂົນສົ່ງກະສິກຳ, ລົດໄຟຟ້າ, ລົດທົດລອງ, ລົດຮຽນຂັບ, ລົດກົນຈັກລໍ້ພິເສດ, ລົດພ່ວງ, ລົດຈັກ, ຍານພາຫະນະທີຮູບຊົງພາຍນອກເປັນມົນລະພິດຮ້າຍແຮງ ແລະ ມີຄວາມສ່ຽງດ້ານຄວາມປອດໄພ, ລົດລໍ້ເຫຼັກ, ລົດຕີນເຫຼັກພວງທີ່ອາດເຮັດໃຫ້ທາງເສຍຫາຍ ແລະ ອອກແບບຄວາມໄວຕ່ຳກວ່າ 70ກິໂລແມັດ/ຊົ່ວໂມງ ລົງມາ ແມ່ນບໍ່ອະນຸຍາດໃຫ້ເຂົ້າທາງດ່ວນ.

ຕາມແລວທາງດ່ວນມີການຕິດຕັ້ງກ້ອງວົງຈອນປິດຕະຫຼອດເສັ້ນທາງ ເພື່ອຕິດຕາມ, ຄຸ້ມຄອງ, ກວດກາ ແລະ ປັບໃໝທຸກພຶດຕິກຳທີ່ເປັນການລັກລອບ ຫຼື ທຳລາຍ ບັນດາສິ່ງອຳນວຍຄວາມສະດວກຕ່າງໆຕາມແລວທາງດ່ວນ;

 

ບໍລິສັດ ຮ່ວມທຶນພັດທະນາທາງດ່ວນລາວ-ຈີນ ຈະປະກາດແຈ້ງການປິດຊ່ອງທາງຊົ່ວຄາວ ຫາກມີການບຳລຸງຮັກສາສ້ອມແປງເສັ້ນທາງ ແລະ ອຸມົງ ຫຼືມີການດຳເນີນກິດຈະກຳດ້ານການຄຸ້ມຄອງ ແລະ ຄວບຄຸມຄວາມປອດໄພໃນການຈະລາຈອນທີ່ຈຳເປັນຕ່າງໆ;

ພາຍຫຼັງທີ່ທາງດ່ວນເປີດນຳໃຊ້ຢ່າງເປັນທາງການແລ້ວ, ຍານພາຫະນະ, ບຸກຄົນ, ອົງການຈັດຕັ້ງຕ່າງໆຈະຕ້ອງປະຕິບັດຕາມກົດໝາຍວ່າດ້ວຍການຈະລາຈອນຂອງ ສປປ ລາວ, ລະບຽບການວ່າດ້ວຍການຄຸ້ມຄອງທາງດ່ວນທີ່ສຳປະທານໃນ ສປປ ລາວ ແລະ ລະບຽບການອື່ນໆທີ່ກ່ຽວຂ້ອງ. ອົງການຈັດຕັ້ງຕ່າງໆ ທີ່ຮ່ວມມືກັບທາງດ່ວນຈະດຳເນີນການປັບໃໝຕາມມາດຕະການທີ່ກ່ຽວຂ້ອງ ສຳລັບຍານພາຫະນະທີ່ລະເມີດກົດລະບຽບ.

ກະຊວງໂຍທາທິການ ແລະ ຂົນສົ່ງໄດ້ອອກຂໍ້ຕົກລົງ ເລກທີ 30428/ຍທຂ ລົງວັນທີ 18 ທັນວາ 2020 ວ່າດ້ວຍການຄຸ້ມຄອງດ່ວນສໍາປະທານ ນະຄອນຫຼວງວຽງຈັນ ວັງວຽງ.

View Comments

Leave a Reply

Your email address will not be published. Required fields are marked *

ກະລຸນາຫ້າມຄັດລອກບົດຄວາມກ່ອນໄດ້ຮັບອະນຸຍາດ