ບໍລິສັດເພັດສະຫວ່າງ ຮ່ວມພັດທະນາກາເຟ ໃຊ້ງົບປະມານເກັບຊື້ໝາກກາເຟ 1 ຕື້ກວ່າກີບຕໍ່ວັນ

ຂປລ. ປັດຈຸບັນ ຊາວສວນກາເຟ ເມືອງປາກຊ່ອງກຳລັງຂຸ້ນຂ້ຽວເກັບຜົນຜະລິດ ໃຫ້ມາຈຳໜ່າຍໃຫ້ແກ່ບັນດາບໍລິສັດ ແລະ ບັນດາໂຮງງານເກັບຊື້ກາເຟ ເພື່ອໃຫ້ທັນຕາມລະດູການ. ໃນນັ້ນ, ບໍລິສັດເພັດສະຫວ່າງ ຮ່ວມພັດທະນາກາເຟຂາເຂົ້າ-ຂາອອກ ຈຳກັດ ກໍເປັນໜຶ່ງໃນບໍລິສັດທີ່ໄດ້ເກັບຊື້ໝາກກາເຟ ນຳພໍ່ແມ່ປະຊາຊົນຊາວສວນກາເຟ ຢູ່ເມືອງປາກຊ່ອງ ມາອົບແຫ້ງຂາຍ ໂດຍໃຊ້ງົບປະມານໃນການເກັບຊື້ຈຳນວນ 1 ຕື້ກີບຕໍ່ວັນ ແລະ ຕ້ອງໄດ້ສືບຕໍ່ຊື້ໄປຈົນໝົດລະດູການເກັບກູ້ຜົນຜະລິດ.

 

ທ່ານ ນາງ ລັດສະໜີ ວົງພັກດີ ປະທານບໍລິສັດເພັດສະຫວ່າງ ຮ່ວມພັດທະນາກາເຟຂາເຂົ້າ-ຂາອອກ ຈຳກັດ ໄດ້ໃຫ້ສຳພາກຕໍ່ສື່ມວນຊົນ ເມື່ອບໍ່ດົນນີ້ວ່າ: ໃນລະດູການເກັບກູ້ຜົນຜະລິດກາເຟ ໃນປີນີ້, ຢູ່ເມືອງປາກຊ່ອງ ເຫັນວ່າມີຄວາມຄຶກຄື້ນດີ, ເນື່ອງຈາກລາຄາໝາກກາເຟໃນປີນີ້ ເພີ່ມຂຶ້ນໃນຮອບ 5 ປີ ຈາກລາຄາ 2.000-2.500 ກີບຕໍ່ກິໂລ ມາເປັນ 3.300 ກີບຕໍ່ກິໂລ, ເຊິ່ງຊາວສວນກາເຟ ໄດ້ພາກັນເກັບໝາກກາເຟມາຂາຍມື້ໜຶ່ງປະມານ 2.000 ກວ່າໂຕນ ໃຫ້ແກ່ບັນດາໂຮງງານ ແລະ ຜູ້ປະກອບການເກັບຊື້ກາເຟ ຢູ່ພາຍໃນເມືອງ, ໃນນັ້ນ ບໍລິສັດເພັດສະຫວ່າງ ຮ່ວມພັດທະນາກາເຟຂາເຂົ້າ-ຂາອອກ ຈຳ ກັດພວກເຮົາ ແມ່ນໃຊ້ງົບປະມານໃນການເກັບຊື້ ຈຳນວນ 1 ຕື້ກວ່າກີບຕໍ່ວັນ ຫລື ປະ ມານ 300-400 ໂຕນຕໍ່ວັນ ແລະ ຊື້ທຸກມື້ໆສະສົມໄວ້ຫລາຍວັນ, ເຮັດໃຫ້ໝູນເງິນບໍ່ທັນໃຫ້ແກ່ຊາວສວນເປັນບາງຄັ້ງຄາວ.

ຕໍ່ບັນຫາດັ່ງກ່າວ, ທ່ານ ນາງ ລັດສະໜີ ວົງພັກດີ ໄດ້ຮຽກຮ້ອງມາຍັງພາກລັດ ກໍຄື ພາກສ່ວນກ່ຽວຂ້ອງ ເຂົ້າມາມີສ່ວນຮ່ວມໃນການແກ້ໄຂບັນຫາຊື້ໝາກກາເຟ ຫລື ມີຊ່ອງທາງໃດໜຶ່ງເພື່ອຊ່ວຍບັນດາບໍລິສັດ ແລະ ຜູ້ເກັບຊື້ກາເຟ ໂດຍສະເພາະ ການສະໜັບສະໜູນດ້ານທຶນຮອນໃນການເກັບຊື້ ໃຫ້ພຽງພໍກັບຄວາມຕ້ອງການຂາຍກາເຟຂອງຊາວສວນ ເພາະຊາວສວນບໍ່ມີໂຮງງານຜະລິດ ສະນັ້ນພວກເຮົາຕ້ອງໄດ້ເກັບຊື້ນຳປະຊາຊົນມາຜະລິດ ເພື່ອສົ່ງອອກ. ຖ້າເກັບຊື້ບໍ່ທັນໝາກກະເຟຈະເນົ່າ ແລະ ຜະລິດບໍ່ໄດ້ຄຸນນະພາບ ເມື່ອເກັບແລ້ວຕ້ອງໄດ້ມາສົ່ງເຂົ້າໂຮງງານຜະລິດ ບໍ່ໃຫ້ເກີນ 24 ຊົວໂມງ ເພື່ອຮັກສາຄຸນນະພາບ ແລະ ຄວາມສົດຂອງໝາກກາເຟ.
ທ່ານ ນາງ ລັດສະໜີ ວົງພັກດີ ຍັງໃຫ້ຮູ້ອີກວ່າ: ເພື່ອຮັບປະກັນດ້ານລາຄາລາຄາໃຫ້ແກ່ຊາວສວນ, ໃນຕໍ່ໜ້າທາງບໍລິສັດ ຢາກໄດ້ໂຮງງານຂົ້ວກາເຟສຳເລັດຮູບເປັນຊອງ ເພື່ອຮອງຮັບສ່ວນໜຶ່ງ ເມື່ອລາຄາຕະຫລາດໂລກຫລຸດລົງ ເຮົາຈະເອົາເຂົ້າໂຮງງານຂົ້ວຂອງເຮົາເອງ.

ຂ່າວ-ພາບ: ວີລະວັນ

Cr: ປະເທດລາວ Pathedlao

View Comments

Leave a Reply

Your email address will not be published. Required fields are marked *

ກະລຸນາຫ້າມຄັດລອກບົດຄວາມກ່ອນໄດ້ຮັບອະນຸຍາດ