ທ່ານ ນາງ ວິໄລຄຳ ໂພສາລາດ ຄະນະປະຈຳປະ ທານກວດກາພັກ ຮອງລັດຖະ ມົນຕີກະຊວງໂຍທາທິການ ແລະ ຂົນສົ່ງ (ຍທຂ) ໄດ້ໃຫ້ສໍາພາດກ່ຽວກັບ ວຽກງານພັດທະນາໂຄງລ່າງພື້ນຖານຄົມມະນາຄົມຕໍ່ນັກຂ່າວ ໜັງສືພິມ ປະຊາຊົນເມື່ອບໍ່ດົນມານີ້ວ່າ: ການເຊື່ອມຈອດພາຍໃນ ແມ່ນພວກເຮົາໄດ້ສໍາເລັດຫຼາຍໂຄງການ ເປັນຕົ້ນແມ່ນສໍາເລັດການກໍ່ສ້າງຂະ ຫຍາຍທາງເລກ 21 (ຜາເມືອງ-ທ່າສີ), ການກໍ່ສ້າງຂົວຂ້າມນ້ໍາຂອງ (ໂຄກເຂົາດໍ-ປາກລາຍ), ກໍ່ສ້າງທາງ 16A (ປາກຊ່ອງ-ຫຼັກ 52 ແຂວງ ອັດຕະປື), ທາງ 6A ຫາງລ້ອງ-ສົບເບົາ, ທາງ 6B (ສົບເບົາ-ປ່າຮ່າງ), ທາງເລກ 4 (ຫົງສາ-ຊຽງແມນ), ທາງເມືອງຊຽງຮ່ອນ-ເມືອງຄອບ-ກ້ອນຕື່ນ, ທາງເລກ 5A (ຂົວນ້ໍາຍອນ-ລ້ອງແຈ້ງ-ຊາຍແດນແຂວງຊຽງຂວາງ) ແລະ ອື່ນໆ.
(ພາບປະກອບ)
(ພາບປະກອບ)
ນອກນີ້, ຍັງໄດ້ພັດທະນາທາງຫຼວງແຂວງ, ທາງຊົນນະບົດ, ທາງເຂົ້າຫາເຂດເສດຖະກິດ ແລະ ຈຸດສຸມການຜະລິດ, ດ້ວຍການຮ່ວມືກັບບັນດາຄູ່ຮ່ວມພັດທະນາຕ່າງໆ, ມາຮອດປີ 2019 ສປປ ລາວ ມີລະບົບຕາໜ່າງເສັ້ນທາງທັງໝົດ 58.254 ກມ, ເພີ່ມຂຶ້ນ 1.922 ກມ ທຽບໃສ່ປີ 2015 ສັງລວມແລ້ວປັດຈຸບັນມີເສັ້ນທາງທຽວໄດ້ຕະຫຼອດປີໄປເຖິງທຸກໆເມືອງໃນປະເທດ. ໃນນີ້, ມີເສັ້ນທາງປູຢາງໄປເຖິງທຸກເທດສະບານແຂວງໃນທົ່ວປະເທດ ແລະ ມີ 138 ເມືອງ ມີເສັ້ນທາງປູຢາງເຂົ້າເຖິງ ຊຶ່ງກວມເອົາ 93,2% (ຈາກທັງໝົດ 148 ເມືອງ) ໃນທົ່ວປະເທດ.
(ພາບປະກອບ)
(ພາບປະກອບ)
Cr: FM 90
