ໂຄວິດ-19 ສືບຕໍ່ລະບາດໜັກໃນທົ່ວໂລກ ຂະນະ ທີ່ລາວ ຍັງບໍ່ພົບຜູ້ຕິດເຊື້ອເພີ່ມ

ຂປລ.ໃນວັນທີ 9 ພະຈິກ 2020 ນີ້, ທ່ານນາງ ດຣ ລັດສະໝີ ວົງຄໍາຊາວ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໄດ້ລາຍງານກ່ຽວກັບສະພາບການປ້ອງກັນ, ຄວບຄຸມ ແລະແກ້ໄຂພະຍາດ COVID-19 ວ່າ: ພະຍາດນີ້, ຍັງສືບຕໍ່ລະບາດຢ່າງໜັກໜ່ວງໃນທົ່ວໂລກ ເຊິ່ງມາຮອດວັນທີ 9 ພະຈິກ 2020 ມີການຢັ້ງຢືນຜູ້ຕິດເຊື້ອພະຍາດດັ່ງກ່າວຫລາຍກວ່າ 50,7 ລ້ານຄົນໃນ 216 ປະເທດ. ໃນນີ້, ເສຍຊິວິດຫລາຍກວ່າ 1,2 ລ້ານຄົນ ແລະ ປິ່ນປົວຫາຍດີກວ່າ 35,7 ລ້ານຄົນ.

ສ່ວນປະເທດທີ່ມີການລາຍງານການຕິດເຊື້ອ ແລະ ເສຍຊີວິດຫລາຍກວ່າໝູ່ແມ່ນສະຫະລັດອາເມລິກາ ເຊິ່ງມີຜູ້ຕິດເຊື້ອສະສົມກວ່າ 10,2 ລ້ານຄົນ ແລະ ເສຍຊີວິດສະສົມ 243.730 ກວ່າຄົນ; ສໍາລັບຢູ່ຂົງເຂດອາຊີກໍແມ່ນປະເທດອິນເດຍທີ່ມີທ່າອ່ຽງຕິດເຊື້ອເພິ່ມຂຶ້ນ, ມີຜູ້ຕິດເຊື້ອສະສົມ 8,5 ລ້ານກວ່າຄົນ ແລະ ຜູ້ຕິດເຊື້ອມື້ດຽວສູງເຖິງ 46.660 ກວ່າຄົນ. ສຳລັບໃນບັນດາກຸ່ມປະເທດອາຊຽນ ມາຮອດວັນທີ 9 ພະຈິກ 2020 ມີການຢັ້ງຢືນຜູ້ຕິດເຊື້ອພະຍາດ COVID-19 ແມ່ນ 999.270 ຄົນ ແລະ ເສຍຊີ ວິດແລ້ວ 23.984 ຄົນ.


ສໍາລັບການເຝົ້າລະວັງພະຍາດນີ້ຢູ່ ສປປ ລາວ, ມາຮອດ 17:00 ໂມງຂອງວັນທີ 8 ພະຈິກ 2020 ເຫັນວ່າໄດ້ມີຜູ້ເດີນທາງເຂົ້າມາປະເທດເຮົາຜ່ານດ່ານຕ່າງໆ ທັງໝົດ 1.013 ຄົນ ເຊິ່ງມີຈຸດຜ່ານດ່ານລາວ-ໄທ 555 ຄົນ, ດ່ານລາວ-ຈີນ 28 ຄົນ, ດ່ານລາວ-ກຳປູເຈຍ 7 ຄົນ, ໂດຍທັງໝົດໄດ້ຮັບການກວດແທກອຸນຫະພູມຮ່າງກາຍ, ແຕ່ບໍ່ພົບຜູ້ມີອາການເປັນໄຂ້ ແລະ ໄດ້ເກັບຕົວຢ່າງທຸກໆຄົນມາກວດ (ຍົກເວັ້ນຜູ້ຂັບລົດຂົນສົ່ງ ແລະ ຜູ້ຕິດຕາມ) ແລ້ວຈຶ່ງນຳສົ່ງໄປສະຖານທີ່ຈຳກັດບໍລິເວນທີ່ກຳນົດໄວ້ຈົນກວ່າຈະຄົບກຳນົດ 14 ວັນ. ປັດຈຸບັນ, ທົ່ວປະເທດມີຜູ້ຈໍາກັດບໍລິເວນຈໍານວນ 3.025 ຄົນຢູ່ 32 ສູນ ແລະ ໄດ້ເກັບຕົວຢ່າງມາກວດວິເຄາະຈໍານວນ 271 ຄົນ, ຜົນກວດວິເຄາະທັງໝົດແມ່ນບໍ່ພົບເຊື້ອ, ໝາຍຄວາມວ່າໃນວັນທີ 8 ພະຈິກ 2020 ສປປ ລາວ ບໍ່ມີຜູ້ຕິດເຊື້ອໃໝ່. ສັງລວມການກວດວິເຄາະ ແຕ່ເດືອນມັງກອນ ຮອດວັນທີ 8 ພະຈິກ 2020 ໄດ້ເກັບຕົວຢ່າງມາກວດ ທັງໝົດ 69.483 ຕົວຢ່າງ, ກວດພົບເຊື້ອສະສົມ 24 ຄົນ; ປັດຈຸບັນ ຄົນເຈັບຕິດເຊື້ອພະຍາດ COVID-19 ຜູ້ທີ 24 ແມ່ນຍັງສືບຕໍ່ປິ່ນປົວຢູ່ໂຮງໝໍມິດຕະພາບ.

ທ່ານນາງ ດຣ ລັດສະໝີ ວົງຄໍາຊາວ ກ່າວອີກວ່າ: ຍ້ອນສະພາບການລະບາດຂອງພະຍາດ COVID-19 ໃນທົ່ວໂລກ ຍັງສືບຕໍ່ເພີ່ມຂຶ້ນຢ່າງຕໍ່ເນື່ອງ ເຮັດໃຫ້ມີຜູ້ຕິດເຊື້ອ ແລະ ເສຍຊີວິດເປັນຈຳນວນຫລວງຫລາຍ ຈຶ່ງຮຽກຮ້ອງມາຍັງທຸກພາກສ່ວນໃນສັງຄົມ ເອົາໃຈໃສ່ປະຕິບັດຕາມແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີຢ່າງຖືກຕ້ອງ ແລະ ເຄັ່ງຄັດ, ສືບຕໍ່ປະຕິບັດການດຳລົງຊີວິດປົກກະຕິແບບໃໝ່ ໃຫ້ກາຍເປັນຄວາມຊິນເຄີຍ, ປະຕິບັດມາດຕະການປ້ອງກັນການຕິດເຊື້ອຢ່າງເຂັ້ມງວດເພື່ອສະກັດກັ້ນ ແລະ ຫລຸດຜ່ອນການລະບາດຂອງພະຍາດ COVID-19 ໃນປະເທດຂອງພວກເຮົາບໍ່ໃຫ້ຂະຫຍາຍເປັນວົງກວ້າງ.
ຂ່າວ: ສຸພາສະຫວັນ ສີຊະນະມຸງຄຸນ

View Comments

Leave a Reply

Your email address will not be published. Required fields are marked *

ກະລຸນາຫ້າມຄັດລອກບົດຄວາມກ່ອນໄດ້ຮັບອະນຸຍາດ