ມາອີກແລ້ວ..!!!ເຕືອນພາກໃຕ້ກຽມຮັບມື ພາຍຸໝຸນເຂດຮ້ອນ (Goni) ວັນທີ 5 -6 ພະຈິກນີ້

ໃນວັນທີ 3 ພະຈິກ 2020, ກົມອຸຕຸນິຍົມ ແລະ ອຸທົກກະສາດ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ໄດ້ອອກແຈ້ງເຕືອນໄພ ສະບັບເລກທີ 1436/ກອຕທ ກ່ຽວກັບພາຍຸໝຸນເຂດຮ້ອນ (Goni) ແຕ່ໄລຍະວັນທີ 05 ຫາ 06 ພະຈິກ 2020.

ພາຍຸໝຸນເຂດຮ້ອນ (Goni) ຫົວທີ 9 ປະຈໍາປີ 2020 ໃນເຂດດ້ານຕາເວັນຕົກຂອງມະຫາສະໝຸດປາຊີຟິກຕອນເໜືອ, ຊຶ່ງໃນເວລາ 08 ໂມງ ຂອງ ວັນທີ 03 ພະຈິກ 2020 ມີຈຸດສູນກາງຢູ່ເສັ້ນຂະໜານທີ 14,9 ອົງສາເໜືອ ແລະ ເສັ້ນແວງທີ 115,3 ອົງສາຕາເວັນອອກ ພວມເຄື່ອນທີ່ມາທາງທິດຕາເວັນຕົກດ້ວຍຄວາມໄວ 15 ກິໂລແມັດຕໍ່ຊົ່ວໂມງ,

 

ຄາດຄະເນພາຍຸຫົວນີ້ ຈະເຄື່ອນຂຶ້ນຝັ່ງ ພາກກາງຕອນລຸ່ມຂອງປະເທດ ສສ ຫວຽດນາມ ໃນວັນທີ 5 ຫາ 6 ພະຈິກ 2020 ແລະ ສືບຕໍ່ອ່ອນກໍາລັງລົງເປັນພາຍຸດີເປຊັນ ເຄື່ອນທີ່ຜ່ານແຂວງອັດຕະປື ແລະ ຈໍາປາສັກ, ຊຶ່ງຈະເຮັດໃຫ້ມີຝົນຕົກໃນລະດັບປານກາງ ຫາ ໜັກ ແລະ ມີລົມພັດແຮງ ຢູ່ບາງທ້ອງຖີ່ນ.

ດັ່ງນັ້ນ, ກົມອຸຕຸນິຍົມ ແລະ ອຸທົກກະສາດ ຈຶ່ງຂໍແຈ້ງເຕືອນເຖິງປະຊາຊົນ ແລະ ອົງການປົກຄອງທ້ອງຖິ່ນ ທຸກພາກສ່ວນທີ່ອາໃສຢູ່ແຂວງພາກໃຕ້ ເຊັ່ນ: ແຂວງສາລະວັນ, ເຊກອງ, ຈໍາປາສັກ ແລະ ແຂວງອັດຕະປື ຈົ່ງມີສະຕິລະມັດລະວັງຕໍ່ສະພາບຝົນຕົກໜັກ ແລະ ລົມພັດແຮງ, ນ້ຳຖ້ວມຊຸ, ນ້ຳຖ້ວມອັ່ງ ແລະ ພ້ອມນີ້ ໃຫ້ຕິດຕາມຂ່າວພະຍາກອນອາກາດ ຈາກກົມອຸຕຸນິຍົມ ແລະ ອຸທົກກະ ສາດເປັນປະຈໍາ.

View Comments

Leave a Reply

Your email address will not be published. Required fields are marked *

ກະລຸນາຫ້າມຄັດລອກບົດຄວາມກ່ອນໄດ້ຮັບອະນຸຍາດ