ສະເຫລີມສະຫລອງວັນສ້າງຕັ້ງ ເຫລົ່າຮົບຊ່າງແສງ ຄົບຮອບ 66 ປີ

ຂປລ. ພິທີສະເຫລີມສະຫລອງ ວັນສ້າງຕັ້ງເຫລົ່າຮົບຊ່າງແສງ ກອງທັບປະຊາຊົນລາວ ຄົບ ຮອບ 66 ປີ (23 ຕຸລາ 1954-23 ຕຸລາ 2020) ໄດ້ຈັດຂຶ້ນໃນວັນທີ 23 ຕຸລາ 2020 ຢູ່ທີ່ກອງກວດກູ້ລະເບີດເພື່ອມະນຸດສະທຳກອງທັບ (ກອງພັນ58), ໂດຍການເຂົ້າຮ່ວມເປັນປະທານຂອງ ສະ ຫາຍ ພົນຕີ ປະສິດ ທ່ຽງທຳ ກຳມະການຄະນະພັກກະຊວງ, ຮອງຫົວໜ້າກົມໃຫຍ່ເສນາທິການກອງ ທັບ, ມີສະຫາຍ ພັນເອກ ວຽງໄຊ ໄຊສະໝອນ ຫົວໜ້າກົມຊ່າງແສງ ກົມໃຫຍ່ເສນາທິການກອງທັບ, ມີບັນດາສະຫາຍຄະນະພັກ-ຄະນະບັນຊາກົມ, ກອງ, ພະແນກການ, ຫ້ອງການ, ກອງພັນ, ກອງ ຮ້ອຍ, ຂະແໜງການກົມຊ່າງແສງ ເຂດໃຈກາງ ແລະ ພະນັກງານອາວຸໂສບຳນານເຂົ້າຮ່ວມ.


ໃນພິທີ ສະຫາຍ ພັນເອກ ສີພອນໄຊ ຄຳທອງເຫວີນ ຮອງຫົວໜ້າກົມຊ່າງແສງ ກົມໃຫຍ່ເສນາທິການກອງທັບ ໄດ້ເລົ່າຫວນຄືນມູນເຊື້ອການເຕີບໃຫຍ່ຂະຫຍາຍຕົວຂອງເຫລົ່າຮົບຊ່າງແສງຕະຫລອດໄລຍະ 66 ປີ ຜ່ານມາ, ເຊິ່ງສະຫາຍໄດ້ຍົກໃຫ້ເຫັນຜົນງານແຕ່ລະໄລຍະທີ່ເຫລົ່າຮົບຊ່າງແສງຍາດມາໄດ້, ພ້ອມທັງເປັນການທົບທວນຄືນ ເຖິງມູນເຊື້ອປະຫວັດສາດຂອງເຫລົ່າຮົບຊ່າງແສງທີ່ ໄດ້ໝູນວຽນມາບັນຈົບຄົບຮອບອີກວາລະໜຶ່ງ.
ເຫລົ່າຮົບຊ່າງແສງ ກອງທັບປະຊາຊົນລາວ ໄດ້ກໍາເນີດເກີດຂຶ້ນ ໃນວັນທີ 23 ຕຸລາ ປີ 1954 ທີ່ບ້ານປູນ, ເຂດທີ່ໝັ້ນແຫ່ງໜຶ່ງຂອງແຂວງຫົວພັນ, ທ່າມ ກາງທີ່ສະພາບການຕໍ່ສູ້ ສົງຄາມຮຸກຮານຂອງພວກລັດທິລ່າເມືອງຂຶ້ນແບບເກົ່າທີ່ດຸເດືອດຂ້ຽວຂາດ ແລະ ເປັນປີມ້ວນທ້າຍຂອງລັດທິລ່າເມືອງຂຶ້ນແບບເກົ່າ ທີ່ເຂົ້າມາຮຸກຮານລາວມາ ເປັນເວລາ 60 ກວ່າປີຜ່ານມາແລ້ວ. ພໍໄດ້ຮັບການສ້າງຕັ້ງຂຶ້ນແລ້ວ ກໍໄດ້ຮັບການມອບໝາຍໜ້າທີ່ອັນໜັກໜ່ວງຈາກຂັ້ນເທິງ ຄຽງບ່າຄຽງໄຫລ່ ກັບກົມກອງ ແລະ ເຫລົ່າຮົບອື່ນໆ ເຄື່ອນໄຫວຕີສັດຕູປະກອບສ່ວນອັນສໍາຄັນ ເຂົ້າໃນການປົກປັກຮັກສາສອງແຂວງເຕົ້າໂຮມ, ທີ່ເປັນຖານທີ່ໝັ້ນຍຸດທະສາດສໍາຄັນ ຂອງການປະຕິວັດໄວ້ໄດ້ຢ່າງໝັ້ນຄົງ.

 


ການເຄື່ອນໄຫວປະຕິບັດໜ້າທີ່ວິຊາສະເພາະ ເຫລົ່າຮົບຊ່າງແສງໃນໄລຍະຜ່ານມານັ້ນມັນໄດ້ກາຍເປັນມູນເຊື້ອທີ່ອົງອາດກ້າຫານທີ່ລໍ້າຄ່າຂອງຕົນ ພາຍໃຕ້ການນໍາພາຂອງພັກປະຊາຊົນປະຕິວັດລາວ, ມູນເຊື້ອນັ້ນກໍໄດ້ຮັບການເຊີດຊູສູງຂຶ້ນເລື້ອຍໆ, ດ້ວຍນໍ້າໃຈສາມັກຄີຮັກແພງເປັນຈິດໜຶ່ງໃຈ ດຽວກັນຢູ່ອ້ອມຂ້າງພັກ-ລັດ ພາຍໃຕ້ການນໍາພາຂອງບັນດາສະຫາຍການນໍາ ໃນແຕ່ລະຮຸ່ນຈົນຮອດປັດຈຸບັນ, ກ້າວເຂົ້າສູ່ໄລຍະແຫ່ງການສ້າງສາພັດທະນາປະເທດຊາດ ຍັງໄດ້ປະກອບສ່ວນຢ່າງຕັ້ງໜ້າເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບ, ໄປພ້ອມກັບການພັດທະນາເສດຖະກິດ-ສັງຄົມພັດທະນາພື້ນຖານໂຄງລ່າງ ຢູ່ຊົນນະບົດ, ພາຍໃຕ້ການຊີ້ນໍາ-ນໍາພາ ຢ່າງໃກ້ຊິດຈາກກົມໃຫຍ່ເສນາທິ ການ ກໍຄື ກະຊວງປ້ອງກັນປະເທດ ກໍໄດ້ປະກອບສ່ວນດ້ວຍຄວາມພິລະອາດຫານ ທາງດ້ານການປ້ອງກັນບັນດາເປົ້າໝາຍຍຸດທະສາດທີ່ສໍາຄັນ, ຄຽງຄູ່ກັນນັ້ນ ກໍໄດ້ຕັ້ງໜ້າປະຕິບັດ 4 ໜ້າທີ່ໃຫຍ່ 26 ແຜນງານຂອງຄະນະພັກກະຊວງປ້ອງກັນປະເທດວາງອອກ ຢ່າງເປັນຂະບວນຟົດຟື້ນ, ສາມາດສ້າງໄດ້ຫລາຍກົມກອງປອດໃສເຂັ້ມແຂງໜັກແໜ້ນ, ກອງ 3 ປອດ ແລະ ກອງວັດທະນະທໍາ ແລະ ຍັງມີບາງກົມກອງ ພວມເປັນເປົ້າໝາຍທີ່ຈະສ້າງເປັນກອງຈຸດສຸມ, ກອງວັດທະນະທໍາຕາມທິດຂອງກະຊວງປ້ອງກັນປະເທດວາງອອກ ເຊິ່ງໄລຍະຜ່ານມາ ກໍໄດ້ຮັບການຍ້ອງຍໍຊົມເຊີຍ ຈາກພັກ-ລັດ ແລະ ການ ຈັດຕັ້ງ ຂັ້ນເທິງຢ່າງສົມກຽດ.

View Comments

Leave a Reply

Your email address will not be published. Required fields are marked *

ກະລຸນາຫ້າມຄັດລອກບົດຄວາມກ່ອນໄດ້ຮັບອະນຸຍາດ