ທ່ານສັນຕິພາບ ພົມວິຫານ ເຈົ້າແຂວງສະຫວັນນະເຂດເດີນທາງລົງມອບເຄື່ອງຊ່ວຍເຫລືອປະຊາຊົນທີ່ໄດ້ຮັບຜົນກະທົບຈາກນ້ຳຖ້ວມເຂດ ເມືອງເຊໂປນ ແລະ ເມືອງພີນ

ຕາມການລາຍງານຂອງກອງເລຂາຕ້ານໄພພິບັດເມືອງເຊໂປນໃຫ້ຮູ້ວ່າ: ຮອດວັນທີ 17 ຕຸລາ, ມີ 60 ບ້ານທີ່ໄດ້ຮັບຜົນກະທົບ, ນໍ້າຖ້ວມບ້ານ 40 ບ້ານ,1.781 ຫຼັງຄາ, 2.029 ຄອບຄົວ, ມີເຮືອນເປ້ເພ 33 ຫຼັງ; ນໍ້າຖ້ວມເນື້ອທີ່ນາ 1.752 ເຮັກຕາ, ສວນປູກເຂົ້າ 831ເຮັກຕາ, ໜອງປາ 271 ໜອງ,ສວນໄມ້ອຸດສາຫະກຳ 712 ເຮັກຕາ, ສວນພືດຜັກຕ່າງໆ 52 ເຮັກຕາ, ງົວຕາຍ 2 ໂຕ, ແບ້ຕາຍ 16 ໂຕ, ສັດປີກ 100 ກວ່າໂຕ, ຊົນລະປະທານ 4 ແຫ່ງ, ໂຮງຮຽນຖືກນໍ້າຖ້ວມ 13 ແຫ່ງ, ປະຕູນໍ້າ 2 ແຫ່ງ, ສຸກສາລາ 4 ແຫ່ງ, ຖ້ວມວິດຖ່າຍ 1.135ໜ່ວຍ. ປະຈຸບັນ, ໄດ້ມີປະຊາຊົນເປັນພະຍາດຖອກທ້ອງ, ໄຂ້ຫວັດ, ຕີນເປື່ອຍ, ຕາແດງ ແລະອື່ນໆແລ້ວຫຼາຍກວ່າ 1.600 ກໍລະນີ, ເສັ້ນທາງເປເພ ແລະຖືກຕັດຂາດຫຼາຍແຫ່ງເຊັ່ນ: ແຕ່ແຍກໄປເມືອງນອງ ຫາ ຈຸດສຸມກະຕູບ-ແດນວິໄລ, ທາງແຕ່ບ້ານດົງສະຫວັນ ຫາ ຈຸດສຸມລະໂກ, ເສັ້ນທາງໄປລາດຫໍ້, ຜາບັງ, ຈຽງຕູບ, ລະວິງ ແລະບ້ານອື່ນໆ. ໂອກາດນັ້ໜ, ທ່ານເຈົ້າແຂວງສະຫວັນນະເຂດ ຮ່ວມກັບຂະແໜງການຕ່າງໆ ກໍ່ໄດ້ນໍາເອົາເຄື່ອງຊ່ວຍເຫຼືອທີ່ຈໍາເປັນ ນໍາມາມອບໃຫ້ເມືອງເຊໂປນ ເພື່ອມອບຕໍ່ໃຫ້ປະຊາຊົນຜູ້ໄດ້ຮັບຜົນກະທົບຄັ້ງນີ້ ລວມມີ: ເຂົ້າສານ 300 ກະສອບ, ເທົ່າກັບ 1.500 ກິໂລ, ນໍ້າດື່ມ 500 ແພັກ, ເຕັນ 10 ດາງ, ໝີ່ 20 ແກັດ, ປາກະປ໋ອງ 10 ແກັດ ແລະຖົງເຄື່ອງ ທີ່ປະກອບມີ: ມຸ້ງ, ປາກະປອງ ແລະຢາປົວພະຍາດ 150 ຊຸດ ພ້ອມນີ້ ກໍ່ມີພະແນກກະສິກໍາ ແລະ ປ່າໄມ້ແຂວງ ມອບເງິນຊ່ວຍເຫຼືອອີກຈໍານວນ 2,5 ລ້ານກີບ.

 

ເວລາຕໍ່ມາ, ທ່ານເຈົ້າແຂວງກໍ່ໄດ້ເດີນທາງໄປມອບເຄື່ອງຊ່ວຍເຫຼືອໃຫ້ເມືອງພີນ ໂດຍມີທ່່ານ ສາລີ ວິນລາວັນ ເຈົ້າເມືອງໆພີນ ກ່າວຮັບ ເຊິ່ງມີມູນຄ່າ 20,7 ລ້ານກີບ ລວມມີ: ເຂົ້າສານ, ນໍ້າດື່ມ, ໝີ່ ແລະ ຖົງເຄື່ອງ ທີ່ປະກອບມີ ມຸ້ງ, ປາກະປ໋ອງ ແລະຢາປົວພະຍາດອີກຈໍານວນໜຶ່ງ; ພ້ອມນີ້ ກໍ່ມີພະແນກກະສິກໍາ ແລະປ່າໄມ້ແຂວງ ມອບເງິນ 1 ລ້ານກີບ, ໂດຍທ່ານເຈົ້າເມືອງພີນ ໄດ້ລາຍງານໃຫ້ຮູ້ວ່າ: ຢູ່ເມືອງພີນ ຝົນເລີ່ມຕົກແຕ່ວັນທີ 7-18 ຕຸລາ 2020 ເຮັດໃຫ້ນໍ້າເຊບັ້ງຫຽງ, ເຊກຸມກາມ, ເຊທ່າມວກ ໄຫຼເຂົາຖ້ວມທົ່ງນາ ແລະບ້ານທີ່ຕັ້ງລຽບແຄມເຊ ເຊິ່ງມີບ້ານໄດ້ຮັບຜົນກະທົບ 36 ບ້ານ, 995 ຄອບຄົວ, ພົນລະເມືອງ 7.717ຄົນ ແລະ ເນື້ອທີ່ນາ 556, ສວນ 22 ເຮັກຕາ, ຖ້ວມໜອງປາເສຍຫາຍ 3 ໜອງ, ເສັ້ນທາງຖືກຜົນກະທົບ 7 ເສັ້ນ, ຖ້ວມທາງ 11 ຈຸດ, ເຊິ່ງມາຮອດວັນທີ 18 ຕຸລາ ມີບ້ານຖືກນໍ້າຖ້ວມແລ້ວ 11 ບ້ານ, ມີ 331 ຫຼັງຄາ.

ຕໍ່ສະພາບການດັ່ງກ່າວ, ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ໄດ້ສະແດງຄວາມເປັນຫ່ວງຕໍ່ເຫດການໄພທໍາມະຊາດຄັ້ງນີ້ ອັນໄດ້ກະທົບຕໍ່ການດໍາລົງຊີວິດ, ຜົນລະປູກ ແລະສັດລ້ຽງຂອງປະຊາຊົນ ພ້ອມນີ້ ກໍ່ໄດ້ແນະນໍາໃຫ້ທຸກຄົນຕ້ອງມີຄວາມອົດທົນ ແລະສູ້ຊົນ ພ້ອມກັນຜ່ານຜ່າວິກິດຄັ້ງນີ້, ເນັ້ນໃຫ້ການນໍາເມືອງຕ້ອງເປັນເຈົ້າການ ໃນການຕິດຕາມກວດກາ ແລະເຝົ້າລະວັງຢ່າງເຂັ້ມງວດ, ກຽມຍົກຍ້າຍປະຊາຊົນ ໃນເຂດທີ່ຕໍ່າ ພ້ອມຈັດສັນທີ່ພັກຊົ່ວຄາວ, ສຸມກໍາລັງລົງຊ່ວຍເຫຼືອປະຊາຊົນໃນການເກັບກູ້ເຂົ້າ ລວມທັງເຄື່ອງອຸປະໂພກ-ບໍລິໂພກ ແລະກະກຽມຢາປົວພະຍາດທີ່ອາດຈະເກີດຂຶ້ນ ເພື່ອຊ່ວຍເຫຼືອບັນເທົາທຸກແກ່ປະຊາຊົນ.

 

ພາບແລະຂ່າວຈາກ : ຫນັງສືພິມ ສະຫວັນພັດທະນາ

View Comments

Leave a Reply

Your email address will not be published. Required fields are marked *

ກະລຸນາຫ້າມຄັດລອກບົດຄວາມກ່ອນໄດ້ຮັບອະນຸຍາດ