ສຸດຍອດແທ້ໆ..!!!ຢຶດຖືອາຊີບ ລ້ຽງໄກ່ພັນໄຂ່ ສ້າງລາຍຮັບ 60-70 ລ້ານກີບຕໍ່ປີ

ຂປລ.ການປູກຝັງ-ລ້ຽງສັດ ແມ່ນວຽກງານໜຶ່ງທີ່ພັກ-ລັດ ໃຫ້ຄວາມສຳຄັນ ແລະ ກໍໄດເອົາ ໃຈໃສ່ຊຸກຍູ້ສົ່ງເສີມ ໃຫ້ພໍ່ແມ່ປະຊາຊົນ ເປັນເຈົ້າ ການຜະລິດໃຫ້ເປັນສິນຄ້າ ເພື່ອສ້າງລາຍຮັບໃຫ້ແກ່ຄອບຄົວ ເພື່ອແກ້ໄຂຄວາມທຸກຍາກພ້ອມທັງພັດທະນາຄອບຄົວ ໃຫ້ຮັ່ງມີເຂັ້ມແຂງ, ກາຍເປັນຄອບຄົວແບບຢ່າງໃຫ້ແກ່ຄອບຄົວອື່ນໆ ຄືກັບຄອບຄົວທ່ານ ພົງສະຫວັດ ອິນພອນ ທີ່ໄດ້ຢືດຖືເອົາການລ້ຽງໄກ່ພັນໄຂ່ ແລະ ລ້ຽງໝູ ເປັນສິນຄ້າ ຈົນກາຍເປັນຄອບຄົວຕົວແບບໃນການສ້າງເສດຖະກິດຄອບ ຄົວຂອງບ້ານ ກວນຈັນ ເມືອງຄຳເກີດ ແຂວງບໍລິຄຳໄຊ.


ຫວ່າງບໍ່ດົນມານີ້ ທ່ານ ພົງສະຫວັດ ອິນພອນ ໄດ້ໃຫ້ສຳພາດຕໍ່ນັກຂ່າວເມືອງວ່າ: ຕົນເອງໄດ້ປະກອບອາຊີບລ້ຽງໄກ່ພັນໄຂ່ມາແຕ່ປີ 2015 ເພາະຕົນເອງໄດ້ຮຽນວິຊາຊີບດ້ານການປູກຝັງ-ລ້ຽງ ສັດ, ໃນເບື້ອງຕົ້ນໄດ້ລົງທຶນທັງໝົດ 230 ລ້ານກີບ ເພື່ອສ້າງຟາມໄກ່ພັນໄຂ່ຈຳນວນ 2 ຟາມ, ຄອກໝູ 1 ຟາມ, ຈົກໜອງປາ 1 ໜອງ ແລະ ໄດ້ຊື້ໄກ່ແມ່ພັນສາວຈຳນວນ 3.500 ໂຕ ໂດຍມີແຮງງານຕົ້ນຕໍແມ່ນອາໃສຄົນໃນຄອບຄົວ 3 ຄົນ. ພາຍຫລັງນຳໄກ່ແມ່ພັນມາລ້ຽງ ປະມານໜຶ່ງອາທິດໄກ່ກໍເລີ່ມໃຫ້ໄຂ່ມື້ລະ 60 ແຕະ, ຈາກນັ້ນນຳເອົາໄປຂາຍຕາມທ້ອງຖິ່ນ ແລະ ທ້ອງຕະຫລາດ.

ທ່ານ ພົງສະຫວັດ ອິນພອນ ເຫັນວ່າການລ້ຽງໄກ່ພັນໄຂ່ ບໍ່ມີຄວາມຫຍຸ້ງຍາກຫລາຍ ທັງມີກຳໄລດີ ແລະ ຕະ ຫລາດ ກໍມີຄວາມຕ້ອງການສູງ; ສະນັ້ນ ຈຶ່ງໄດ້ສືບຕໍ່ລ້ຽງມາຕະຫລອດ. ສ່ວນວິທີການລ້ຽງໄກ່ພັນໄຂ່ແມ່ນປີ 2 ເດືອນຕ້ອງໄດ້ປ່ຽນແມ່ພັນເທື່ອໜຶ່ງ ແລະ ຂາຍໄກ່ແມ່ພັນເກົ່າອອກ ຊື້ໄກ່ແມ່ໃໝ່ເຂົ້າມາແທນ, ໃນເວລາລ້ຽງຂໍ້ສຳຄັນຕ້ອງໄດ້ເອົາໃຈໃສ່ດ້ານຄວາມສະອາດການບົວລະບັດເປັນຢ່າງດີ ແລະ ໃຫ້ອາຫານມື້ໜຶ່ງ 2 ຄັ້ງຄື: ຕອນເຊົ້າ 4:00 ໂມງແລະຕອນທ່ຽງ 1:00 ໂມງ ແລະ ໃຫ້ວິຕາມິນເສີມອີກ ພ້ອມທັງຕິດຕາມເຝົ້າລະວັງພະຍາດລະບາດທີ່ມັກເກີດກັບໄກ່ແມ່ພັນ ໂດຍມີພະນັກງານຫ້ອງການກະສິກຳ ແລະ ປ່າໄມເມືອງ ມາຊ່ວຍດ້ານວິຊາການ, ແນະນຳວິທີປ້ອງກັນ ແລະ ຕິດຕາມກວດກາຢ່າງໃກ້ສິດດັ່ງນັ້ນຢູ່ຟາມໄກ່ ຈຶ່ງບໍ່ຄອຍມີບັນຫາພະຍາດລະບາດເກີດຂຶ້ນ.

ທ່ານ ພົງສະຫວັດ ອິນພອນ ໃຫ້ຮູ້ອີກວ່າ: ນອກຈາກລ້ຽງໄກ່ພັນໄຂ່ແລ້ວ ຍັງໄດ້ລ້ຽງໝູອີກຈຳນວນ 40 ໂຕ ແລະ ລ້ຽງປາອີກຈຳນວນໜຶ່ງ, ສະເລ່ຍລາຍຮັບປີໜຶ່ງຈາກການຂາຍໄຂ່, ຂາຍໝູ ແລະ ຂາຍປາ ປະມານ 60-70 ກີບຕໍ່ປີ. ປັດຈຸບັນຄອບຄົວທ່ານ ພົງສະຫວັດ ອິນພອນມີເຮືອນຢູ່ຖາວອນ 1 ຫລັງ, ມີລົດ 6 ລໍ້ 1 ຄັນ, ມີທຶນຮອນສົ່ງລູກຮຽນ ແລະ ມີເງິນເກັບຈຳນວນໜຶ່ງ ໄວ້ເປັນທຶນຂະຫຍາຍຟາມອອກຕື່ມອີກ. ດັ່ງທີ່ຮູ້ນຳກັນຄອບຄົວທ່ານ ພົງສະຫວັດ ອິນພອນການສ້າງເສດຖະກິດຄອບຄົວ ຈະປະສົບຜົນສຳເລັດ ກ້າວສູ່ຄວາມຮັ່ງມີໄດ້ກໍຕ້ອງມີຄວາມອົດທົນສູງ ເຊິ່ງໃຊ້ເວລາພໍສົມຄວນ ໃນການລົງມືເຮັດແທ້ທຳຈິງ ບຸກບືນສູ້ຊົນຜ່ານຜ່າອຸປະສັກຕ່າງໆ ບໍ່ຍອມທໍ້ຖອຍ ຈຶ່ງສາມາດປະສົບຄວາມສຳເລັດ.

ໂດຍ: ສີວັນ ອິນທິລາດ, ປະເທດລາວ Pathedlao

View Comments

Leave a Reply

Your email address will not be published. Required fields are marked *

ກະລຸນາຫ້າມຄັດລອກບົດຄວາມກ່ອນໄດ້ຮັບອະນຸຍາດ