ລັດຖະບານໄທ ມອບເຄື່ອງຊ່ວຍເຫຼືອດ້ານການແພດ ຕ້ານໂຄວິດ-19 ໃຫ້ລາວ

ຂປລ. ໃນວັນທີ 29 ກັນຍາ 2020 ຢູ່ກະຊວງການຕ່າງປະເທດໄທ, ທ່ານ ແສງ ສຸຂະຕິວົງ ເອກອັກຄະລັດຖະທູດລາວ ປະຈຳຣາຊະອານາຈັກໄທ ໄດ້ເຂົ້າຮັບເຄື່ອງຊ່ວຍເຫລືອທາງການແພດ ເພື່ອປ້ອງກັນການແຜ່ລະບາດຂອງໂຄວິດ-19 ຈາກລັດຖະບານໄທ ທີ່ມອບໃຫ້ລັດຖະບານລາວ, ໂດຍມີ ທ່ານ ນາງ ອາຈະລີ ສີລັດຕະນະເບົາ ອະທິບໍດີ (ຫົວໜ້າກົມ) ອາຊີຕະເວັນອອກ, ທ່ານ ກຽດຕິຄຸນ ຊາດປະເສີດ ປະທານ ສະມາຄົມໄທ-ລາວ ເພື່ອມິດຕະພາບ ແລະ ຜູ້ບໍລິຫານສະຖາບັນເທັກໂນໂລຊີ ພະຈອມກ້າວເຈົ້າຄຸນທະຫານລາດກະບັງ, ພ້ອມພາກສ່ວນກ່ຽວຂ້ອງຂອງທັງສອງຝ່າຍ ເຂົ້າຮ່ວມເປັນສັກຂີພິຍານ.

 

ອຸປະກອນຊ່ວຍເຫລືອໃນຄັ້ງນີ້, ປະກອບມີ: ເຄື່ອງກວດຫາເຊື້ອໂຄວິດ-19 ແບບຄວາມດັນບວກ ຈຳນວນ 4 ເຄື່ອງ ແລະ ເຄື່ອງກວດອຸນນະພູມອັດຕະໂນມັດ 4 ເຄື່ອງ, ໂດຍເປັນນະວັດຕະກຳເທັກໂນໂລຊີ ຂອງສະຖາບັນພຣະຈອມກ້າວ ເຈົ້າຄຸນທະຫານລາດກະບັງ. ພ້ອມນັ້ນ, ສະມາຄົມໄທ-ລາວ ເພື່ອມິດຕະພາບ ແລະ ກົມອາຊີຕາເວັນອອກ ຍັງຈະຈັດຫາເຄື່ອງຊ່ວຍຫາຍໃຈອີກ ຈຳນວນ 10 ຊຸດ ມາມອບໃຫ້ລັດຖະບານ ສປປ ລາວ ໃນອະນາຄົດອັນໃກ້ນີ້.

ການມອບອຸປະກອນຊ່ວຍເຫລືອຄັ້ງນີ້, ເປັນສ່ວນໜຶ່ງໃນການເສີມສ້າງ ຄວາມສຳພັນທີ່ດີ ລະ ຫວ່າງ ສອງປະເທດ ແລະ ກໍເປັນໂອກາດສະເຫລີມສະຫລອງ ວັນຄົບຮອບ 70 ປີ ການສ້າງຕັ້ງສາຍພົວພັນການທູດ ລາວ-ໄທ (19/12/1950-2020).

View Comments

Leave a Reply

Your email address will not be published. Required fields are marked *

ກະລຸນາຫ້າມຄັດລອກບົດຄວາມກ່ອນໄດ້ຮັບອະນຸຍາດ