ກະຊວງສາທາ ກຽມສຳຫລວດອັດຕາ ການຕິດເຊື້ອ “ເຮສໄອວີ” ໃນກຸ່ມສ່ຽງ

ຂປລ. ໃນວັນທີ 29 ກັນຍາ 2020 ທີ່ແຂວງວຽງຈັນ, ສູນຕ້ານເອດ ແລະ ພະຍາດຕິດຕໍ່ທາງເພດສຳພັນ, ກະຊວງສາທາລະນະສຸກ ໂດຍການສະ ໜັບສະໜູນຈາກກອງທຶນໂລກ ຕ້ານເອດ ໄດ້ຈັດກອງປະຊຸມກຽມຄວາມພ້ອມ ໃນການສຳຫລວດອັດຕາການຕິດເຊື້ອ ເຮສໄອວີ ໃນກຸ່ມສ່ຽງ (ສາວບໍລິ ການ) ພາຍໃຕ້ການເປັນປະທານຂອງ ທ່ານ ດຣ. ສີສະຫວາດ ສຸດທະນີລາໄຊ ຮອງຫົວໜ້າກົມຄວບຄຸມພະຍາດຕິດຕໍ່, ທ່ານ ດຣ. ພູທອນ ສຸດທະລັກ ຫົວໜ້າສູນຕ້ານເອດ ແລະ ພະຍາດຕິດຕໍ່ທາງເພດສຳພັນ ມີຄະນະວິຊາການຈາກແຂວງບໍ່ແກ້ວ, ຫລວງນໍ້າທາ, ຫລວງພະບາງ, ນະຄອນຫລວງວຽງຈັນ, ສະຫວັນນະເຂດ ແລະ ຈໍາປາສັກ ເຂົ້າຮ່ວມ.


ກອງປະຊຸມຄັ້ງນີ້, ມີຈຸດປະສົງເພື່ອເປັນການກຽມຄວາມພ້ອມທາງດ້ານວິຊາການ, ແຜນງານການສຳຫລວດ, ວິທີການ ແລະ ອຸປະກອນ ທີ່ຈະຕ້ອງນຳໃຊ້ເຂົ້າໃນການສຳຫລວດ, ເພື່ອເປັນການ ກະກຽມທາງດ້ານບຸກຄະລາກອນການແພດ, ນັກສຳພາດ, ນັກວິເຄາະ ຂອງບັນດາແຂວງ ທີ່ຈະເຮັດການສຳຫລວດ. ພ້ອມນີ້, ກໍເພື່ອເປັນການກະກຽມໃນການຈັດກອງປະຊຸມ ຂໍການສະໜັບສະໜູນ ຈາກເຈົ້າຂອງຫ້າງຮ້ານກິນດື່ມ, ຮ້ານອາຫານ, ບັນເທີງ ເພື່ອໃຫ້ຄວາມອຳນວຍສະດວກ ແລະ ປະກອບ ສ່ວນໃນການສຳຫລວດຄັ້ງນີ້, ໃຫ້ດຳເນີນໄປຕາມແຜນການ. ນອກນີ້, ກໍເພື່ອເປັນການສຶກສາຄົ້ນຄວ້າ ເຝົ້າລະວັງ ກ່ຽວກັບອັດຕາການຕິດເຊື້ອຂອງພະຍາດເອດ ໃນ ສປປ ລາວ.


ກອງປະຊຸມຈະດຳເນີນໄປເປັນເວລາ 4 ວັນ, ໂດຍມີວິທະຍາກອນມາຈາກສູນຕ້ານເອດ ແລະ ພະຍາດຕິດຕໍ່ທາງເພດສຳພັນ, ຫ້ອງວິເຄາະຂັ້ນສູນກາງ, ໂຮງໝໍແຂວງ. ນອກຈາກຈະໄດ້ຮຽນຮູ້ວິທີການສຳຫລວດແລ້ວ ສຳມະນາກອນ ຍັງຈະໄດ້ລົງທົດສອບປະຕິບັດຕົວຈິງ ໃນການສຳພາດກຸ່ມສ່ຽງ, ການນຳໃຊ້ເຄື່ອງເອເລັກໂຕຮນິກ ໃນການບັນທຶກຂໍ້ມູນ, ການນຳສົ່ງຂໍ້ມູນຜ່ານລະບົບອິນເຕີເນັດ, ການກວດແກ້ຂໍ້ມູນພາກສະໝາມ. ຕອນທ້າຍກອງປະຊຸມ ແຕ່ລະແຂວງຈະໄດ້ກຳນົດແຜນງົບປະມານ, ວັນເວລາ ທີ່ຈະຈັດຕັ້ງປະຕິບັດ, ແຜນການຂົນສົ່ງຕົວຢ່າງຈາກແຕ່ລະແຂວງ ມາເຖິງສູນກາງ. ພາຍຫລັງ ສໍາເລັດການສໍາຫລວດ ພວກເຮົາຈະສາມາດຮູ້ໄດ້ກ່ຽວກັບ ສະພາບການແຜ່ລະບາດຂອງພະຍາດເອດໃນ ສປປ ລາວ, ຊຶ່ງມີຄວາມສຳຄັນຫລາຍໃນການນໍາໃຊ້ຂໍ້ມູນ ເພື່ອວາງແຜນໄລຍະຍາວ ແລະ ຊອກຫາຍຸດທະສາດ ໃນການຢຸດຕິພະຍາດເອດໃນ ປີ 2030 ຕາມຄາດໝາຍຂອງອົງການສະຫະປະຊາຊາດຕ້ານເອດ ກໍຄື ແຜນຍຸດທະສາດແຫ່ງຊາດຕ້ານເອດ ຂອງ ສປປ ລາວ.
ຂ່າວ: ສູນຕ້ານເອດ

View Comments

Leave a Reply

Your email address will not be published. Required fields are marked *

ກະລຸນາຫ້າມຄັດລອກບົດຄວາມກ່ອນໄດ້ຮັບອະນຸຍາດ