ຄະນະພັກຮາກຖານກົມສ່ວຍສາອາກອນ ເປີດກອງປະຊຸມໃຫ່ຍ ຄັ້ງທີ IV

ໃນວັນທີ 7 ສິງຫາ 2020, ຄະນະພັກຮາກຖານກົມສ່ວຍສາອາກອນໄດ້ເປີດກອງປະຊຸມໃຫ່ຍ IV ຂຶ້ນທີ່ຫ້ອງປະຊຸມກົມສ່ວຍສາອາກອນ,ໂດຍການເຂົ້າຮ່ວມຂອງສະຫາຍ ສົມດີ ດວງດີ ກໍາມະການສູນກາງພັກ ເລຂາຄະ ນະບໍລິຫານງານພັກກະຊວງການເງິນ, ສະຫາຍ ບຸນໂຈມ ອຸບົນປະເສີດ ຮອງເລຂາຄະນະບໍລິຫານງານພັກກະຊວງ ປະທານກວດກາຄະນະບໍລິຫານງານພັກ, ສະຫາຍ ປອ ພູທະ ນູເພັດ ໄຊສົມບັດ ເລຂາຄະນະພັກຮາກຖານກົມສ່ວຍສາອາກອນ, ມີບັດດາເລຂາ-ຮອງເລຂາໜ່ວຍພັກອ້ອມຂ້ອງກະຊວງການເງິນ, ຕາງໜ້າສາມອົງການຈັດຕັ້ງກົມສ່ວຍສາອາກອນ, ພ້ອມດ້ວຍສະມາຊິກພັກສົມບູນ, ສໍາຮອງ ຂອງກົມສ່ວຍສາອາກອນເຂົ້າຮ່ວມ. ໃນກອງປະຊຸມສະຫາຍ ປອ ພູທະນູເພັດ ໄຊສົມບັດ ເລຂາຄະນະພັກຮາກຖານກົມສ່ວຍສາອາກອນ ໄດ້ຜ່ານບົດລາຍງານການເມືອງ ແລະ ບົດສໍາຫຼວດການນໍາພາລວມຂອງຄະນະພັກຮາກຖານກົມສ່ວຍສາອາກອນ, ຊຶ່ງໄດ້ສະຫຼຸບສັງລວມຕີລາຄາການຈັດຕັ້ງປະຕິບັດວຽກງານຂອງຄະນະພັກຮາກຖານກົມສ່ວຍສາອາກອນໃນໄລຍະຜ່ານມາຢ່າງຖືກຕ້ອງ, ພາວະວີໄສ, ຍົກໃຫ້ເຫັນສະພາບການຕົວຈິງຢ່າງຊັດເຈນ, ພ້ອມທັງກໍານົດທິດທາງລວມ ແລະໜ້າວຽກຕົ້ນຕໍຂອງຄະນະພັກຮາກຖານໃນ 5 ປີຕໍ່ໜ້າໄວ້ຢ່າງຊັດເຈນເປັນຕົ້ນ: ເອົາໃຈໃສ່ຕັ້ັງໜ້າປັບປຸງກໍ່ສ້າງພັກໃຫ້ເຂົ້າມແຂງ, ຖືເອົາການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜັ້ນເປັນວຽກງານໃຈກາງຂອງການກໍ່ສ້າງພັກ ໂດຍຕິດພັນກັບຮາກຖານ ແລະ ຂະບວນການວຽກງານຕົວຈິງ.

 

ແຕ່ນີ້ຮອດປີ 2025 ຕ້ອງເລັ່ງໃສ່ເປົ້າໝາຍກໍ່ສ້າງມະຫາຊົນຜູ້ກ້າວໜ້າເພື່ອຂະຫຍາຍສະມາຊິກພັກໃຫ້ໄດ້ຈໍານວນ 20 ສະຫາຍ ແລະ ສ້າງສະມາຊິກພັກແຂງໃຫ້ໄດ້ 90% ຂອງສະມາຊິກພັກທັງໝົດ, ບໍ່ໃຫ້ມີສະມາຊິກພັກອ່ອນ ຫຼື ຖືກວິໄນ, ຮັບປະກັນການຄຸ້ມຄອງລາຍຮັບສ່ວຍສາອາກອນໃຫ້ມີທ່າອ່ຽງເພີ່ມຂຶ້ນໃນແຕ່ລະປີ 8-10% ທຽບໃສ່ປີຜ່ານມາ ແລະ ທຽບໃສ່ການຂະຫຍາຍຕົວຂອງເສດຖະກິດສະເລ່ຍ 5 ປີໃຫ້ໄດ້ລະຫວ່າງ 7-8% ຂອງ GDP, ສືບຕໍ່ຫັນຫົວໜ່ວຍທຸລະກິດທີ່ບໍ່ແມ່ນຈຸນລະວິສາຫະກິດເຂົ້າລະບົບອາກອນມູນຄ່າເພີ່ມຕາມກົດໝາຍກໍານົດໃຫ້ເພີ່ມຂຶ້ນສະເລ່ຍ 5 ປີ ໃຫ້ໄດ້ 30% ຂອງຖານຫົວໜ່ວຍທຸລະກິດທັງໝົດ, ສູ້ຊົນສ້າງ ແລະ ປັບປຸງກົດໝາຍ ແລະ ນິຕິກໍາໃຕ້ກົດໝາຍ, ກົນໄກການຄຸ້ມຄອງ ແລະ ບໍລິການຜູ້ເສຍອາກອນໃຫ້ມີປະສິດທິຜົນ, ເຂົ້າຮ່ວມໃນການສ້າງກົດໝາຍວ່າດ້ວຍອາກອນຊັບສິນ ແລະ ທີ່ດິນ, ກົດໝາຍວ່າດ້ວຍອາກອນສິ່ງແວດລ້ອມໃຫ້ສໍາເລັດ, ຫັນການຄຸ້ມຄອງສ່ວຍສາອາກອນໃຫ້ໄປສູ່ລະບົບທັັນສະໄໝໃຫ້ສໍາເລັດຂັ້ນພື້ນຖານ, ຊຶ່ງລວມມີການຂະຫຍາຍລະບົບ TaxRIS ໄປສູ່ບັນດາເມືອງໃນຂອບເຂດທົ່ວປະເທດ,ກ້າວໄປເຖິງຫັນການຊໍາລະອາກອນທຸກປະເພດຜ່ານລະບົບດິຈີຕອນໃຫ້ຫຼາຍຂຶ້ນ, ເພີ່ມທະວີປັບປຸງວຽກງານຝຶກອົບຮົມຂອງຂະແໜງສາວຍສາອາກອນໃຫ້ມີຄວາມເຂັ້ມແຂງ ກ້າວໄປສູ່ການສ້າງສະຖາບັນຝຶກອົບຮົມ ແລະ ກ້າວໄປສູ່ການສ້າງວິທະຍາໄລອາກອນ ຂອງ ສປປ ລາວ ໃນຂັ້ນຕໍ່ໄປ ເພື່ອສ້າງຂີດຄວາມສາມາດໃຫ້ແກ່ພະນັກງານຂະແໜງສ່ວຍສາອາກອນໃຫ້ເປັນມືອາຊີບ ແລະ ຊໍານານງານສະເພາະດ້ານ.

ໃນກອງປະຊຸມຄະນະຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕ ປ່ອນບັດຄັດເລືອກເອົາຄະນະພັກຮາກຖານກົມສ່ວຍສາອາກອນຊຸດໃໝ່ ບົນພື້ນຖານຫຼັກການລວມສູນປະຊາທິປະໄຕ ທັງຖືກຕ້ອງສອດຄ່ອງກັບມາດຖານເງື່ອນໄຂທີ່ກໍານົດໄວ້, ຊຶ່ງມີສະໝັກຮັບລົງເລືອກຕັ້ງຈໍານວນ 7 ສະຫາຍ, ຍິງ 1 ສະຫາຍ ແລະ ເລືອກໄດ້ 5 ສະຫາຍຄື: ສະຫາຍ ປອ ພູທະນູເພັດ ໄຊສົມບັນດ ເປັນເລຂາຄະນະພັກຮາກຖານ, ສະຫາຍ ທໍາມະລົດ ລາດຊະພົນ ເປັນຮອງເລຂາຄະນະພັກຮາກຖານ, ສະຫາຍ ສຸພັນ ວິລະວົງ ເປັນກໍາມະການ ທັງເປັນປະທານກວດກາຄະນະພັກຮາກຖານ,ສະຫາຍ ໄພທູນ ທ່ຽງລະໄມ, ສະຫາຍ ວິເລດ ກິນນະວົງ ເປັນກໍາມະການ, ເພື່ອສືບຕໍ່ຊີ້ນໍາ-ນໍາພາວຽກງານຂອງຄະນະພັກຮາກຖານກົມສ່ວຍສາອາກອນໃນຕໍ່ໜ້າໃຫ້ມີການພັດທະນາຂຶ້ນເປັນກ້າວໆ. ໂອກາດດັ່ງກ່າວ,ສະຫາຍ ສົມດີ ດວງດີ ໄດ້ໃຫ້ກຽດໂອ້ລົມຕໍ່ກອງປະຊຸມ ແລະ ໄດ້ສະແດງຄວາມຊົມເຊີຍຕໍ່ການຊີ້ນໍາ-ນໍາພາຂອງຄະນະພັກຊຸດເກົ່າທີ່ໄດ້ຊີ້ນໍາ-ນໍາພາພະນັກງານ, ສະມາຊິກພັກພາຍໃນຄະນະພັກທີ່ປະຕິບັດໜ້າທີ່ການເມືອງຂອງຕົນຍາດໄດ້ຜົນງານ ແລະ ມີຜົນສໍາເລັດຫຼາຍດ້ານ. ພ້ອມນັ້ນ, ທ່ານຍັງໄດ້ສະແດງຄວາມເປັນຫ່ວງເປັນໃຍຕໍ່ດ້ານດີດ້ານອ່ອນ, ຂໍ້ຄົງຄ້າງໃນການຊີ້ນໍາ-ນໍາພາໃນໄລຍະຜ່ານມາ ແລະ ເນັ້ນໃຫ້ຄະນະພັກຊຸດໃໝ່ສືບຕໍ່ນໍາພາປັບປຸງແກ້ໄຂຈຸດອ່ອນ ແລະ ເນັ້ນໜັກບາງວຽກງານຕົ້ນຕໍຕົ້ນຕໍທີ່ຕ້ອງເອົາໃຈໃສ່ເປັນຕົ້ນ: ເອົາໃຈໃສ່ປະເມີນຕີລາຄາຜົນໄດ້ຮັບກໍ່ຄືຜົນສໍາເລັດອີງໃສ່ແຜນ, ຄາດໝາຍຕາມຄວາມຮັບບຜິດຊອບທີ່ໄດ້ຮັບມອບໝາຍ, ການປະຕິ ບັດໜ້າທີ່ວຽກງານວິຊາສະເພາະຕ້ອງມີແບບແຜນກນປະຕິບັດວຽກງານ ແລະ ຜັນຂະຫຍາຍໄປແຕ່ລະປີ, ສໍາຄັນແມ່ນປະຕິບັດຕາມຄາດໝາຍສູ້ຊົນໃຫ້ໄດ້, ປັບປຸງກົດໝາຍ, ນິຕິກໍາ ເພື່ອໃຫ້ລາຍຮັບເພີ່ມຂຶ້ນຈໍາກັດການຮົ່ວໄຫຼ ແລະ ເກັບກໍາບໍ່ໝົດ, ອໍານວຍຄວາມສະດວກໃຫ້ທຸລະກິດໃນການເຄື່ອນໄຫວ, ມີເງື່ອນໄຂພັດທະນາ ເພື່ອເປັນພື້ນ ຖານລາຍຮັບ ແລະ ມີນັກລົງທຶນທີ່ຫຼາຍຂຶ້ນ ທັງສ້າງຄວາມເຂົ້າໃຈກັບຜູ້ປະກອບການໃຫ້ມີຄວາມເຂົ້າໃຈຫຼາຍຂຶ້ນ ໃນການຊໍາລະພັນທະອາກອນຢ່າງຈະແຈ້ງ ແລະ ປະຕິບັດຕາມລະບຽບກົດໝາຍ ເພື່ອປະກອບສ່ວນເຂົ້າໃນການສ້າງ ສາພັດທະນາປະເທດ.

 

 

ຂ່າວ: ອາພັດສະລາ ຈັນທະວົງ

View Comments

Leave a Reply

Your email address will not be published. Required fields are marked *

ກະລຸນາຫ້າມຄັດລອກບົດຄວາມກ່ອນໄດ້ຮັບອະນຸຍາດ